Դիտեք նաև՝

Դիտեք նաև՝

«Հակոբ Հակոբյան և Արմեն Հովհաննիսյան» նախագիծը չպլանավորված էր. ինչպես տղաներն են ասում, նրանց ստեղծեց ժողովուրդը: Տղաների խոսքով՝ նախագծի վրա ջանք, եռանդ, գումար և էներգիա չեն խնայել. աշխատել են գիշեր-ցերեկ: Յուրաքանչյուր նոր գործ անելիս երկար են մտածում և առաջինը հաշվի են առնում հանդիսատեսի արձագանքը: Ինչպես տղաների պրոդյուսերն է ասում, Հակոբն իրենց թիմի պոզիտիվն է, իսկ Արմենը յուրաքանչյուր բացասական մեկնաբանություն շատ ծանր է տանում: BlogNews.am-ը զրուցել է նրանց հետ, պարզել առաջիկա նախագծերի, շոու բիզնեսի ներկայացուցիչների արձագանքի, կորպորատիվների մասին:

Նոր աշխատանքներ

Հակոբ: Այս պահին երեք երգ ենք ձայնագրում, որոնցից մեկն արդեն պատրաստ է: Երեքն էլ պարային ուրախ թեմաներով են: Մի երգի հեղինակը Մարինե Մխիթարյանն է, ով նաև մեր «Ախպերներ» երգն է գրել: Այս անգամ ես Մարինեին խնդրեցի գրել հետևյալ թեմայով, որ մենք շնորհակալություն հայտնենք այն ծնողներին, ովքեր իրենց աղջիկներին պահում են և տալիս իրենց սիրելիներին: Այդ թեմայով էլ գրեցինք այս երգը. «Շնորհակալ ենք Ձեզ, որ տվել եք մեզ ձեր տան աղջկան՝ ծաղկին աննման»: Մի անգամ արդեն երգել ենք այս երգը հարսանիքին, և արձագանքները դրական էին:

Արմեն: Առհասարակ, մեր երգերի տեսահոլովակները հետևյալ սկզբունքով ենք ընտրում. պատրաստում ենք երգը, երգում ենք տարբեր առիթների, լսում ենք մարդկանց արձագանքները, որից հետո հասկանում ենք, որ այն պետք է ունենա տեսահոլովակ:

Անուշ: «Մամա ջան» երգն այս դեպքում բացառություններից էր. առանց ինչ-որ մեկի ցույց տալու, երգելու մենք նկարահանեցինք տեսահոլովակ: Երգն իրենով այնպիսին է, որ հոգեհարազատ է բոլորին. «մամա» բառի մեջ մի ամբողջ աշխարհ է: Դա, միանշանակ, պետք է ունենար տեսահոլովակ:

Չպլանավորած նախագիծ

Հակոբ: Մենք, անկեղծ ասած, չէինք պլանավորում այս նախագիծը, ես անգամ չէի պլանավորում երգել:

Արմեն: Ես էլ չէի պլանավորում դուետով ներկայանալ :)

Հակոբ: «Ախպերս» երգը երբ երգեցինք, արձագանքները շատ էին, և սպասում էին նորության: Արմենի հետ որոշեցինք ևս մեկ քավր անել, ներկայացրինք Կոմիտասի «Հաբրբավ» երգի մշակումը մեր կատարմամբ, մարդիկ ճանաչեցին այդ երգը: Մարդիկ ամեն օր մեզ վիդեոներ են ուղարկում, թե ինչպես են մայրերն իրենց երեխաներին քնացնում այդ երգի տակ: Գուցե մի քիչ մեծամիտ է հնչում, բայց մեր նախագիծը ժողովուրդը ստեղծեց, քանի որ մենք չէինք որոշել երգել միասին:  

Երգերի ընտրությունը:

Հակոբ: Մենք պատահական երգ չենք երգում և չենք երգում միայն գումար աշխատելու համար: 

Անուշ: Նոր աշխատանք անելիս ամենավերջում ենք միայն մտածում գումար աշխատելու մասին:

Արմեն: Նույն «Ախպերներ» երգը երկար ժամանակ կար, բայց ձեռք չէինք տալիս, քանի որ մեր սրտին դեռ չէր հասել: Ժամանակ էր պետք, որպեսզի ներկայացնեինք: Այդ երգի շնորհիվ ծնվեցին նաև մյուս երգերը, շատ մարդիկ նաև տեղեկացան մեր մյուս քավրներից: Մենք մինչև հիմա արձագանքներ ստանում ենք այդ երգի վերաբերյալ, և այն բավականին մեծ դիտումներ գրանցեց:

Կոմերցիոն երգեր և հոնորարներ

Հակոբ: Եթե մենք անենք երգ կոմերցիայի համար, միանշանակ, չի աշխատի: Պետք է սիրես այն, ինչ անում ես: Իհարկե, շատ լավ է, երբ կարողանում ես երգի միջոցով հանել տեսահոլովակի վրա ծախսածդ գումարները. մենք չենք բողոքում:

Անուշ: Իհարկե, ամենավերջինը մտածում ենք կոմերցիայի մասին: «Արդյոք ովքեր են», «Մամա ջան» երգերը  հայրենասիրական են, միանշանակ, կոմերցիոն չեն, բայց այնպես է ստացվում, որ միջոցառումներին այդ երգերը հաճախ են ուզում լսել: Բայց այդ երգերն անելուց մենք չենք մտածել, որ դրանով պետք է փող աշխատենք:

Հակոբ: Բայց որպեսզի շարունակենք, մեզ գումար է պետք:

Արմեն: Մեր մեջ սենց բան կա, որ պարտադիր չէ անել արևելյան մոտիվներով երգեր, որ ավելի շատ պահանջարկ ունենա: Նույն «Ախպերներ» երգում չկա կլկլոց, պարզ և, ինչքան հնարավոր է, մաքուր: Դա էլ ցույց տվեց, որ կոմերցիոն կարող է լինել նաև այդ տեսակ երգերը:

Հակոբ: Լինում են դեպքեր, երբ մեր պահանջած հոնորարներից ավել են մեզ վճարում, դա համարյա միշտ է այդպես լինում:  

Անուշ: Դրսից առաջարկներն ավելի շատ են: Հոլանդիայից մարդիկ կային, իրենք հրավիրել էին, և ի դեպ՝ նույն հարսանիքից երկուսն էին հրավիրել: 

Հակոբ: Ի դեպ՝ մեզ միջացառումներին որպես անակնկալ են տանում, միշտ ինչ-որ թաքուն տեղերով բարձրացնում են բեմ:  

Ձայնասկավառակ

Հակոբ: Ուզում ենք ձայնասկավառակ թողարկել, բայց ոչ թե որ ուզում ենք դրանով գումար վաստակել, այլ երբ գնում ենք դուրս, մարդիկ վերջում հարցնում են՝ ունենք ձայնասկավառակ, թե ոչ։ Մենք ուզում ենք ձայնասկավառակ ունենալ, որպեսզի նվիրենք:

Արմեն: Կա արդեն քանակն այն երգերի, որոնցով կարելի է ձայնասկավառակ թողարկել: Իհարկե, դրա պահն էլ պետք է հասունանա:

Հայտնիությունը և դրա հետևանքները

Հակոբ: Եթե հանդիսատեսը չի սիրում քեզ, ինչքան ուզում ես, փող դիր, ինչքան ուզում ես, թանկ տեսահոլովակներ նկարահանի կամ ամենաթանկ երգահաններից երգեր պատվիրի: «Ախպերներ» տեսահոլովակի վրա մենք գումար չենք ծախսել․ դա նվեր է եղել իմ ծննդյան օրվա առթիվ:

Մենք ֆինանսական աջակցություն չունենք, մենք կոպեկ-կոպեկ հավաքելով կարողանում ենք նոր աշխատանքներ անել: Այսօր այնպես է ստացվել, որ մեզ շատ են հրավիրում տարբեր միջոցառումների, մենք կարողանում ենք ինչ-որ բան տնտեսել: Վատ է, որ շատ մարդիկ դա չեն մարսում:

Արմեն: Մենք մեր յուրաքանչյուր կորպորատիվից ինչ-որ գումար դնում ենք կողք՝ մեր հետագա աշխատանքի համար:

Նախանձության և հայտնի կոլեգաների արձագանքը

Հակոբ: Հետաքրքիր է, որ այսօր շատ մարդիկ այս ամենը չեն մարսում: Իհարկե, երգարվեստում բոլորն իրենց տեղն ունեն: Իմ դեպքում ասում են՝ ինքը հաղորդավար է, ինչու է երգում: Հիմա այնքան հետաքրքիր է, շատերն էլ անգամ մոռացել են, որ ես հաղորդավար եմ և ասում են՝ այնքան եմ սիրում քո երգերը: Այսինքն՝ ես հիմա ինչ-որ ճանապարհ եմ անցնում, և հետաքրքիր է, որ դա շատ արագ է լինում:

Անուշ: Երբ նախագիծը նոր էինք սկսում, ես ասացի՝ երբ մենք հաջողությունների հասնենք, շոու բիզնեսում ովքեր չակերտավոր ընկերներ են հիմա, ձեզանից երես են թեքելու: Դուք պատրաստ եղեք դրան: Ես նրանց նաև ասել եմ՝ երբ սկսեն ձեզ քննադատել, ուրեմն՝ մենք ճիշտ ճանապարհի վրա ենք:

Արմեն: Մեր նախագիծն էլ այնպիսին է, որ տարբերվում է. երկու տղա երգում են եղբայրների, հայրենիքի մասին: Պետք է ասեմ, որ այդ տարածքը բաց էր, և դա էլ կապ ունի մրցակցության, նախանձության հետ: Կոլեգաներից էլ ես զգում․ եթե չեն արձագանքում, ապա ճիշտ ճանապարհին ես:

Հակոբ: Իրականում ինձ ասում էին, որ շոու բիզնեսում իրար հետևից խոսել կա, բայց ես արդեն քանի տարի է՝ այս ոլորտում եմ, իմ կյանքում նման բան չի եղել: Ինձ բոլոր երգիչները սիրել են, բոլորի հետ լավ եմ եղել: Մարդիկ կան, որ մեզ աջակցում են, լավ մեկնաբանություններ են թողնում: Արման Հովհաննիսյանը տեսավ, ասաց՝ ինչ լավն են ձեր երգերը։ Նույնը՝ Ռազմիկ Ամյանը, Լիլիթ Հովհաննիսյանը, Սիլվա Հակոբյանը, Վահրամը: Մարդիկ կան, որ հավանում են: Դրանք մարդիկ են, ովքեր կայացել են և չեն մտածում, որ հեսա կգանք, իրենց կանցնենք:

Ամբողջակցան հոդվածը՝ սկզբնաղբյուր կայքում