▲ Դեպի վեր

lang.iso lang.iso lang.iso

Հանկարծ չստիպես զինվորականներին, որ դեն նետեն Սմերչը, Բուկը․․․ Զաքարյանը՝ Փաշինյանին

ԶՈԻ արդիականացումը միայն նոր զինատեսակ գնելն ու դրա ֆոնի վրա նկարվելը չէ: Այս մասին ֆեյսբուքյան իր էջում գրել է պաշտպանության նախկին փոխնախարար Արտակ Զաքարյանը։

«Ընդհանրապես, եթե հավատանք Նիկոլ Փաշինյանին, Հայաստանն ամայի տարածք էր մինչեւ 2018թ մայիսը եւ միայն նորին պայծառափայլության հրաշափառ հայտնությամբ է հայ ժողովուրդը սկսել ապրել: Մինչ այդ Հայաստան կոչվող տարածքում ասպատակում էին գողերը, ավազակները, թալանչիները, դավաճանները, հող հանձնողները, կեղեքիչները, կեղծարարները, զրպարտիչները եւ այլն: Իսկ երկրում հայտնված զբոսաշրջիկներին ուղղակի ողջակիզում էին: Հիմա եկել են սրբադասված փրկիչներն ու Հայաստանը հանրահռչակող առաքյալները, եւ ամեն ինչ OK-է:

Փաստ N 7: 20 տարի շարունակ ՀՀ ԶՈՒ բյուջեն ամեն տարի (բացառությամբ 2010թ.) ավելացել է, եւ դա նորմալ երեւույթ է, այդպես էլ պետք է լինի: Օրինակ՝ 2018թ. բյուջեն 2017թ. համեմատ ավելացել է 18,1%-ով (38.1 մլրդ դրամ), 2009թ.-ին՝ 2008թ. համեմատ ավելացել է 19,2%-ով (24,1 մլրդ) ու այդ առիթով ոչ ոք ժամանակին գլուխ չի գովացել, ասուլիսներ չի հրավիրել, նախորդներին հաթաթա չի տվել:

Հիմա 80-ականների զենքի եւ դրա «ամոթալի էջ» լինելու մասով:

Հարգելի Նիկոլ Փաշինյան,
Հարգելի բարեկամ,

ՀՀ Զինված Ուժերում կան ե՛ւ 80-ականների, ե՛ւ 90-ականների, ե՛ւ 2000-ականների զինատեսակներ ու դրանց մոդիֆիկացիաները: Դրանք դեռ երկար ժամանակ ծառայելու են Հայաստանի ու Արցախի պաշտպանությանը: Որպես ՊՆ նախկին փոխնախարար, խորհուրդ եմ տալիս եւս մեկ անգամ մանրամասն ընթերցիր ՀՀ Նախագահ Սերժ Սարգսյանի հրամանագրով հաստատված «ԶՈՒ արդիականացման 2018-24թթ ծրագիրը»: Ծանոթացիր ծրագրի բոլոր բաժիններին ու կտեսնես, որ ՀՀ ԶՈԻ արդիականացումը միայն նոր զինատեսակ գնելն ու դրա ֆոնի վրա նկարվելը չէ: Այն ռազմավարական բնույթի, երկարաժամկետ ուղենիշների, միջնաժամկետ եւ կարճաժամկետ ծրագրերի մանրամասն պլանավորում եւ հետեւողական իրականացում է: Ծրագրում տեղ գտած ցանկացած նոր զինատեսակ տրամաբանական շարունակությունն է քո նշած 80-ականների զինատեսակների: Առաջիկայում ձեռքբերվելիք նոր զինտեխնիկանները 80-ականների հետ միասին են կռվելու, ապահովելու հակառակորդի զսպման, կանխման, թիրախավորման, խոցման, եւ ռազմական բնույթի սպառնալիքների չեզոքացման այլ անհրաժեշտ խնդիրները:

Շուտով նշելու ենք Հայոց Բանակի կազմավորման 28-րդ տարեդարձը եւ իհարկե Բանակի ու հաղթանակների մասին հուզիչ ելույթներ ես ունենալու: Ի՞նչ ես կարծում, իսկ եթե քո տրամաբանությանը հետեւելով, Լեւոն տեր-Պետրոսյանը ժամանակին խոսեր եւ մեղադրեր իր նախորդներին, որ ազգային բանակ չեն ստեղծել, եւ ամոթալի է ֆիդայական ջոկատներով կռվելը, ճիշտ կլինե՞ր արդյոք:

Ի՞նչ ես կարծում, ճիշտ կլինե՞ր արդյոք, եթե Ռոբերտ Քոչարյանը՝ օրինակ զրահատանկային եւ հակատանկային ստորաբաժանումները, տարբեր տիպի հրետանային բրիգադները, համազարկային կրակի համակարգերը, խոշոր տրամաչափի ականանետերը, «Ս 300 ՊՍ» զենիթահրթիռային համակարգերը, գրեթե ոչնչից զորամասեր ու մշտական տեղակայման վայրերը, ամբողջ առաջնագծի ահնրաժեշտ ինժիներական աշխատանքները իրակացնելուց եւ համալրելուց հետո հաթաթա տար իր նախորդին, որ, այլեւս ՀՀ ԶՈՒ-ն նոր տեխնիկա, սպառազինություն, համազգեստ, քնելու մահճակալ, արկեր, հրթիռներ եւ այլ պարագաներ ունի:

Ճիշտ կլինե՞ր արդյոք, որ Սերժ Սարգսյանը` օրինակ «ԲՄ-30 Սմերչ» ՀԿՌՀ, «Տոչկա-ՈՒ» ՄՀՀ, «Իսկանդեր-Է» ՕՄՀՀ, «Բուկ» ԶՀՀ, տարատեսակ ԱԹՍ-ներ, Օդուժի, ՀՕՊ եւ այլ սպառազինություն ու տեխնիկա, առաջնագծի կահավորման համար հեռադիտարկման սարքավորումներ եւ այլ ժամանակակից պարագաներ ձեռք բերելուց հետո, հաթաթա տար իր նախորդին, որ իր ձեռքբերած զինատեսակները ավելի մեծ խնդիրներ են լուծում:

Իմ կարծիքով ճիշտ չէր լինի եւ որեւէ պետության մեջ այդ տրամաբանությամբ առաջ չեն գնում (բացառությամբ պոպուլիստների):

Բայց ասեմ, որ բախտդ բերել է, որովհետեւ ԶՈՒ գեներալների եւ բարձրաստիճան սպայակազմի հետ միասին, 2018-24թթ. համար մենք այնպիսի արդիականացման ծրագիր ենք մշակել, որ ձեզ մնում է միայն հերթով իրականացնել դրանք: Վստահ եղիր, որ ձեզանից հետո եկողը չի քննադատելու:

Այնպես, որ զենքի հինն ու նորը արտադրության տարեթվով չի որոշվում, այլ իր գործածելիությամբ, օգտակարությամբ, դրանով լուծվող խնդրի մասշտաբով, ինչպես նաեւ ձեռքբերման ու սպասարկման արժեքով: Ռուսաստանն աշխարհում զենքի խոշոր արտադրողներից մեկն է, բայց իր զինված ուժերի սպառազինության մի զգայի մասը դեռեւս 80-ականների զինատեսակներն են:

P.S./ հումորի կարգով.
Ս300-ը, Տոչկա-ՈՒ-ն, Բուկ-ը, Սմերչ-ը եւ այլ զինատեսակներ 1980-ականների են, հանկարծ չստիպես զինվորականներին, որ դեն նետեն: Դրանցից հակառակորդը վախենում է»,-նշել է նա:

Վերահրապարակումներում` մտքերն ու ինֆորմացիան կարող են չհամընկնել խմբագրության տեսակետի հետ: Ձեր տեսակետը կամ հերքումը կարող եք ուղարկել info@asekose.am-ին
Հասարակություն ավելին