«Այս պահին գրիպի հարուցիչ Հայաստանում չկա: Կա սուր շնչառական գրիպանման հիվանդություն, որն ուղեկցվում է ջերմությամբ, հարբուխով»,-լրագրողների հետ հանդիպման ժամանակ ասաց ՀՀ գլխավոր ինֆեկցիոնիստ Արա Ասոյանը՝ հորդորելով.
«Եթե հիվանդ եք, ունեք ջերմություն, ապա դպրոց, համալսարան կամ աշխատանքի մի գնացեք: Իսկ, եթե ստիպված եք, ապա անպայման դիմակ կրեք, քանի որ վիրուսը 120 սմ հեռավորությունից կարող է անցնել: Ի, դեպ այն պետք է փոխել 8 ժամը մեկ»:
Անդրադառնալով այս շրջանում բնակչության կողմից սխտորի օգտագործմանը՝ ՀՀ գլխավոր ինֆեկցիոնիստը նկատեց.
«Դրա կուլտուրան այնքան արմատացած է մեր ազգաբնակչության մեջ, որ մարդիկ գնում են խաշ ուտելու, անունն էլ դնում են գրիպից պաշտպանվել:
Ամեն դեպքում, սխտոր օգտագործելուց վնաս չկա»:
Արա Ասոյանի հաղորդմամբ՝ այս շրջանում օդակաթիլային հիվանդություններից Հանրապետությունում տարածված են նաև ջրծաղիկն ու քութեշը, բայց դրանք նույնպես անհանգստացնող չեն:
Անի Կարապետյան
