Համացանցի աստղ դարձած հավատարիմ շունն արդեն 20 օր է՝ չի հեռանում համալսարանական հիվանդանոցի ընդունարանի մոտից: Հենց այստեղից է տերը հիվանդանոց մտել: Հերթով հոտոտում է ելումուտ անողներին, որ զգա՝ տիրոջ մոտի՞ց են գալիս: Այդպես՝ հոտոտելով էլ տիրոջ վիրավորվելուց հետո Արցախից Հայաստան է հասել, ճանապարհ է ընկել այն մարդկանց հետևից, ումից տիրոջ հոտն է առել:
Հավատարիմ է մնացել տիրոջը, որի հետ ընդամենը մեկ ամիս առաջ էր ծանոթացել, և որն այս օրերին արդեն չորս վիրահատություն է տարել: Մեկ ոտքն ամպուտացված է: Նշենք՝ որպես կամավոր Արցախ մեկնած Ռոմիկը Ջոնիին գտել էր Մարտակերտի գյուղերից մեկում, ռմբակոծված տան փլատակների տակից:
Տեսանյութը՝ Հովհաննես Գրիգորյանի ֆեյսբուքյան էջից
