ՊՆ զինծառայողների սոցիալական պաշտպանության վարչության և ՊՆ ՌՈ աշխատանքային պլանի համաձայն զորքերում իրականացվող աշխատանքների շրջանակներում N զորամասում հայտնաբերվել են զինվորական վարտիքներ, որոնք բացարձակապես չեն համապատասխանում ՊՆ կարիքների համար ձեռք բերվող նմանատիպ ապրանքների տեխնիկական բնութագրերին և  որոնց կրումը հարիր չէ զինծառայողներին: Այս մասին տեղեկացնում է ՊՆ մամուլի ծառայությունը։

Նախնական ուսումնասիրությունների արդյունքում պարզվել է, որ նմանատիպ վարտիքների խմբաքանակ դեռևս 2017 թվականին փորձ է արվել մատակարարել պաշտպանության նախարարություն, սակայն ակնհայտ ցածրորակության պատճառով այն չի ընդունվել և վերադարձվել է մատակարար ընկերությանը:

Այդուհանդերձ, նախաձեռնված ստուգումների արդյունքում այս պահին արդեն իսկ հայտնաբերվել է շուրջ 10000 անորակ վարտիք։

ՀՀ պաշտպանության նախարարի խիստ հանձնարարականի համաձայն՝ զինված ուժերում այժմ ակտիվ ուսումնասիրություններ են ընթանում զորամասերում անորակ վարտիքների հայտնվելու հանգամանքները պարզելու, մեղավորներին բացահայտելու և օրենքով սահմանված կարգով պատասխանատվության ենթարկելու համար:

Ընթանում է նախաքննություն, նախապատրաստվում են նյութեր՝ քրեական գործի հարուցման համար։

Հիշեցնենք, որ կառավարության նիստի ժամանակ վարչապետ Նիկոլ Փաշինյանը նշել է, որ զինվորների ներքնաշորերի հետ կապված չլուծվող խնդիր կա, և Պաշտպանության նախարարությունը լուրջ զբաղվել է խնդրով, որոշում է կայացվել խնդրի լուծման գործում ներգրավել տեքստիլ ոլորտի արտադրողներին:

Կարդացեք նաև՝ Զինվորների ներքնաշորերի հետ կապված խնդիր կա, տեսախցիկների ներքո բանակցություններ կանցկացնենք արտադրողների հետ