«Նախաքննության ընթացքում «Գագիկ Սողոմոնյան» ֆեյքի հետ կապված ամբողջ շղթան կբացահայտվի, չեմ կարծում՝ սխալ ուղղությամբ ենք գնացել»։
Այս մասին ԱԺ-ում լրագրողների հետ զրույցում հայտարարեց ԱԱԾ տնօրենի տեղակալ Տիգրան Հարությունյանը․
«Հեռու եմ այն մտքից, որ բացարձակ սխալ ուղղությամբ ենք գնացել, ուղղությունը ճիշտ է: Իմ կարծիքով՝ էջ մուտք գործելու թույլտվություն ունեն մի քանի անձինք, որոնք և տպավորություն են ստեղծում, որ էջը շարունակում է գործել որպես Գագիկ Սողոմոնյան անհատ: Կարծում եմ՝ էջին մուտք ունեն մի քանի անձինք, դրանով է պայմանավորված, որ էջը գործում է»,-ասաց նա:
Պնդեց՝ երբ ֆեյքը քրեական դաշտ է մտնում, սա լուրջ խնդիր է․ նա հավաստիացրեց, թե զբաղվում են նաև այլ ֆեյքերով․
«Մեդիադաշտում մենք ունենք ագրեսիվ ստի տարածման փորձեր, Գագիկ Սողոմոնյանն էլ կոնկրետ առանձին խնդիր էր»,- նշեց նա։
ԱԱԾ տնօրենի տեղակալը, անդրադառնալով հարցին, թե պարզվե՞լ է՝ ով է Թեհրանում վայրէջք կատարած օդանավն առևանգել, և բանակցություններ կա՞ն օդանավը Հայաստան վերադարձնելու համար, նշեց, որ օդանավի վերաբերյալ քրեական գործ է հարուցվել «Քրեական օրենսգրքի» 221-րդ հոդվածով՝ օդանավի զավթումը, հիմա աշխատանքներ են տարվում, որ օդանավը վերադարձվի։ ՀՀ ազգային անվտանգության ծառայության տնօրենի տեղակալն անդրադարձավ նաև սահմանային խնդիրներին և վստահեցրեց, որ սահմանապահ զորքերը Սյունիքում իրենց խնդիրները լուծում են առկա և՛ մարդկային, և՛ նյութական ռեսուրսների սահմաններում․
«Չեմ կարծում, որ այս պահի դրությամբ մենք ունենք չլուծվող խնդիրներ»,- շեշտեց Հարությունյանը։ ԱԱԾ քննչական դեպարտամենտում առկա է քրեական գործ, որի շրջանակներում քննություն է իրականացվում այն բոլոր հանգամանքների առնչությամբ, որոնք վերաբերում են պատերազմի ընթացքում որոշակի տարածքների հանձնմանը կամ հրամանատարության կողմից ոչ իրավաչափ գործողությունների կատարմանը կամ հրամաններ տալ-չտալուն,- տեղեկացրեց ԱԱԾ քննչական դեպարտամնետի ղեկավարը և այլ մանրամասներ չհայտնեց՝ ասելով, որ նախաքննություն է ընթանում:
