Ազգային ժողովում երեկ քննարկվում էր   «Ժառանգություն»   խմբակցության ղեկավար Զարուհի Փոստանջյանի ներկայացրած «Լեռնային Ղարաբաղի Հանրապետությունը ճանաչելու մասին» նախագիծը:

Այսօր արդեն տեղի ունեցավ քվեարկություն` օրինագիծն առաջին ընթերցմամբ ընդունելու մասին:

Վարման կարգի վերաբերյալ իրենց կարծիքը հայտնելու հնարավորություն ունեցան պատգամավորները:

Առաջինը ձայնի իրավունք խնդրեց Զարուհի Փոստանջյանը, և մինչ կմիացնեին նրա բարձրախոսը, ԱԺ նախագահը զգուշացրեց, որ, եթե չի խոսելու վարման կարգի վերաբերյալ, կանջատեն բարձրախոսը:

Եվ, մինչ պատգամավորը կհասցներ ասել, որ բանակցային գործընթացներն ի սկզբանե խաթարված են,  Հովիկ Աբրահամյանը կատարեց իր խոստումը:

Նույնը սպառնաց նաև Հրանտ Բագրատյանին:

ԱԺ ՀՀԿ խմբակցության ղեկավար Գալուստ Սահակյանն էլ խոսքում ասաց. «Խոսակցություն գնաց, որ ՀՀԿ-ն բոյկոտում է. տարբերե’ք բոյկոտն ու տհաճությունը»:

Գալուստ Սահակյանը հավելեց, որ քվեարկությանը չեն մասնակցելու:

Մնացած խմբակցությունների ղեկավարները նույնպես արտահայտեցին իրենց դիրքորոշումը` նախագիծը համարելով վաղաժամ:

Ուստի, քվեարկության արդյունքում նախագծին կողմ քվեարկեց 10 հոգի, դեմ` 0, ձեռնպահ`1:

Անի Կարապետյան