ՀՀ ՊՆ մամուլի քարտուղար Արծրուն Հովհաննիսյանը ֆեյսբուքյան իր էջում տեղեկացնում է, որ նախարար Դավիթ Տոնոյանը հրամաններ է ստորագրել, ըստ որոնց՝
«Գեներալ-գնդապետ Մովսես Հրանտի Հակոբյանը նշանակվել է ՊՆ ռազմական վերահսկողական ծառայության պետ, գեներալ-մայոր Կամո Գրիգորի Քոչունցը նշանակվել է ՊՆ ռազմական վերահսկողական ծառայության պետի տեղակալ, գնդապետ Վաչագան Վալերիի Ներսեսյանը նշանակվել է ՊՆ ռազմական վերահսկողական ծառայության գլխավոր տեսուչ»։
Հիշեցնենք, որ երեկ ՀՀ վարչապետի որոշումներով գլխավոր ռազմական տեսուչ Մովսես Հակոբյանը, նրա առաջին տեղակալ Կամո Քոչունցը եւ տեղակալ Վաչագան Ներսեսյանն ազատվել էին աշխատանքից: Որոշումը պայմանավորված է օրենսդրական փոփոխություններով, որով ՀՀ Ռազմական գլխավոր տեսչությունը վերակազմավորվել է եւ անցել ՀՀ պաշտպանության նախարարության ենթակայության տակ: Նոր կազմավորված ստորաբաժանումը ՊՆ վերահսկողության ծառայությունն է, որը կատարելու է նույն գործառույթները, ինչ Ռազմական գլխավոր տեսչությունը:
