ՀՀ վարչապետ, «Քաղաքացիական պայմանագիր» կուսակցության վարչության անդամ Նիկոլ Փաշինյանը Աբովյանում մասնակցել է նախընտրական քարոզարշավի երթին՝ ի աջակցություն ՔՊ-ի քաղաքապետի թեկնածու Գրիգոր Գուլյանի:
Քայլերթը մեկնարկել էր Աբովյանի ծննդատան մոտից և ավարտվելու է 3-րդ միկրոշրջանի 14, 15 և 16 շենքերի հարևանությամբ:
Քայլերթին մասնակցել են նաև Տարածքային կառավարման և զարգացման նախարար Սուրեն Պապիկյանը, Կոտայքի մարզպետ Ռոմանոս Պետրոսյանը և այլ պաշտոնյաներ:
Վարչապետն ու քայլերթի մասնակիցներն անցել են Աբովյանի փողոցներով, լուսանկարվում, ողջունում բնակիչներին:
Աբովյանի քաղաքապետի ընտրությունները կայանալու են հունիսի 9-ին: Որպես թեկնածու է առաջադրվել նաև գործող քաղաքապետ Վահագն Գևորգյանը:
Վարչապետը շնորհակալություն հայտնեց երթի մասնակիցներին:
«Հույս ունեմ, որ հունիսի 9-ին Աբովյանի ընտրողները հնարավորինս ակտիվ կմասնակցեն ընտրություններին և կանեն իրենց քայլը հանուն ազատության, հանուն օրինականության, հանուն ժողովրդավարության:
Հայաստանում ընտրությունների կեղծման էջն անվերադարձ փակված է, և միայն դուք եք որոշում, թե ով լինի մարզպետ, քաղաքապետ, պատգամավոր, վարչապետ: Ամեն ընտրություն պետք է դարձնենք տոն՝ ժողովրդի իշխանության վերահաստատման»,- նշեց Նիկոլ Փաշինյանը:
