«Մենք ունենք ուժեղ թշնամի, որի դեմ զենք-զինամթերք պետք է ունենանք, ինչը երկրորդական է, քանի որ առաջինը մարտական ոգին է»,-այսօր՝ լրագրողների հետ հանդիպման ժամանակ խոսելով ռազմահայրենասիրական երգերի դերի ու նշանակության մասին՝ ասաց գեներալ-մայոր Արկադի Տեր-Թադևոսյանը՝ (Կոմանդոս):
Լրացնելով նրա խոսքը՝ գեներալ-մայոր Աստվածատուր Պետրոսյանը նկատեց. «Ոգեղեն երգը փոխարինում է փամփուշտին, մարդուն մղում է նորանոր սխրանքների»:
Պատերազմի բովով անցած մեր քաջ հայորդիներն ասուլիսի ընթացքում հայտնեցին, որ այսօր բոլորիս համախմբել է հայրենասեր, գուսան, «Հայկազունք» երաժշտական համույթի գեղարվեստական ղեկավար, Հայաստանի Հանրապետության մշակույթի վաստակավոր գործիչ, Արցախյան պատերազմի մասնակից, «Երկրապահ» կամավորների միության անդամ գուսան Հայկազունի (Գագիկ Նազարյան) ծանր հիվանդությունը: Մարդ, ում ստեղծագործությունները ոգեշնչել են բոլորին ու մղել մարտի: Նրանց խոսքով՝ առաջին փուլի բուժման համար իրենք արդեն օգնություն են ցուցաբերել, բժիշկն իր միջոցներով վիրահատություն է կատարել, բայց դա բավարար չէ, դեղերը շատ թանկ են: Առայժմ կփորձեն բուժել Հայաստանում.
«Օգնենք և առողջ տեսնենք կենդանի լեգենդին»,-կոչ արեց Աստվածատուր Պետրոսյանը:
Ժողովրդական երգիչ Արսեն Գրիգորյանն էլ նշեց, որ սա օգնություն չէ, սա յուրաքանչյուրիս պարտականությունն է:
«Նա մեր պետության, ազգի անփոխարինելի զինվորն է: Հիշենք թեկուզ «Հայեր միացեք»-ը:
Նշենք, որ փետրվարի 5-ին կազմակերպվելու է բարեգործական համերգ՝ «Ապրի՛ր առողջ» խորագրով: Իսկ նրանք, ովքեր կցանկանան օգնել գուսանին՝ Անելիք բանկում բացված է հետևյալ հաշվեհամարը՝ Գագիկ Նազարյանի անունով.
11805003430500 ՀՀ դրամ
11805003430501 ԱՄՆ դոլար
Գագիկ Ստեփանի Նազարյանը ծնվել է 1951 թվականի ապրիլի 20-ին Արտաշատ քաղաքում։ Վաղ հասակում կորցրել է հորը։
Արդեն դպրոցական տարիներին սկսել է գրել հայրենասիրական և սիրային երգեր: Մասնագիտությամբ շինարար-ինժեներ է։
Մասնակցել է Արցախյան պատերազմին Արտաշատի «Երկրապահ» ջոկատում Մհեր Սաղաթելյանի հրամանատարության ներքո։ Մարտական գործողությունները սկսել է Երասխ գյուղից, եղել է նաև Գետաշենում, Կապանում, Գորիսում, Բերձորում։ Ծանր մարտերում չի մասնակցել, քանի որ իր հրամանատարը նախընտրել է, որ գուսանը շարունակի նոր երգեր գրել։ Շատ երգեր գրել է անմիջապես մարտի դաշտում։
Անի Կարապետյան
