«Խաղաղություն չի կարող լինել՝ վախ տարածելով, խաղաղություն չի կարող լինել՝ Ադրբեջանի պահանջով Անկախության հռչակագիրը Սահմանադրությունից հանելով»,- այս մասին այսօր հրավիրված հանրահավաքում նշեց փաստաբան, «Ուժեղ Հայաստան» դաշինքի պատգամավորության թեկնածու Արամ Վարդևանյանը։

«Հայի տեսակը ուժեղն է, արժանապատիվն է և մարդասերն է․․․ Այսօր մենք կանգնած ենք ճակատագրական ընտրության առաջ՝ կա՛մ պաշտպանում ենք մեր ինքնությունը, մեր պետականությունը, մեր արժեքները, կա՛մ կորցնում ենք այն, ինչ սերունդներով պահել ենք»,- ընդգծեց Վարդևանյանը։

***

«Ամենաամոթալին, որին մենք ականատես ենք լինում, դա երկրի ղեկավար կոչվածի վերաբերմունքն է զոհվածների մայրերին, քույրերին ու դուստրերին», Հանրապետության հրապարակում «Ուժեղ Հայաստան» դաշինքի հանրահավաքի ընթացքում այս կարծիքը հայտնեց հասարական գործիչ, պրոդյուսեր Ռուբեն Մխիթարյանը։

«Այ տղա՛, դու ո՞վ դառար, որ զոհվածի մորը քաշքշես, դու ո՞վ դառար, որ նահատակվածի հորը կալանավորես կամ անպատվես։ Դու ո՞վ դառար, որ գերի ընկածի երեխային ձեռք առնես։ Ո՞վ ես դու»,- ասաց Մխիթարյանը՝ դիմելով Նիկոլ Փաշինյանին, ինչին հաջորդեց հանրահավաքի մասնակիցների վանկարկումը․ «Ա-մոթ-ա-մոթ»։ Մխիթարյանի ելույթի ժամանակ շատերը հուզվեցին, երբ նա սկսեց կատարել․ «Արշալույս էր, նոր էր բացվել․․․» երգը։

***

«Ուժեղ Հայաստան» կուսակցության հանրահավաքի ժամանակ տեսակապի միջոցով հեռարձակվեց կուսակցության առաջնորդ և վարչապետի թեկնածու Սամվել Կարապետյանի ուղերձը։

«Փոփոխությունները գալիս են․․․ Փոփոխությունները մարդիկ կզգան իրենց կյանքում հունիսի 7-ից հետո։ Յուրաքանչյուր հայ կապրի արժանապատիվ կյանքով․․․ Ես երաշխավորում եմ»,- ասաց Սամվել Կարապետյանը՝ ընդգծելով, որ հայ ժողովուրդը պետք է կայացնի վերջին տասնամյակների ամենակարևոր որոշումներից մեկը և վճռի այս և գալիք սերունդների ապագան։

«Այսօր սրանից ավելի կարևոր հարց չկա։ Հայերը պետք է մասնակցեն ընտրություններին, որպեսզի ուրիշները մեր փոխարեն չորոշեն մեր ճակատագիրը։ Պատմությունը կհիշի հունիսի 7-ը որպես օր, երբ հայ ժողովուրդը ընտրություն կատարեց ապրել ազատ և ուժեղ Հայաստանում»,- հավելեց Կարապետյանը։

Հանրապետության հրապարակում ժամը 19։00-ին մեկնարկում  է «Ուժեղ Հայաստան» կուսակցության հանրահավաքը։ Կուսակցության անդամներն ու նրանց աջակիցները Մերգելյան ինստիտուտին հարակից տարածքից քայլերթով շարժվել են են դեպի Հանրապետության հրապարակ՝ քաղաքացիներին կոչ անելով մասնակցել հանրահավաքին։

***

Քաղաքագետ Արա Պողոսյանի ֆեյսբուքյան գրառումը․ ««Ուժեղ Հայաստանը», չնայած բացթողումներին, բոլոր շանսերը ունի հաջորդ իշխանություն լինելու համար։
Սա պատմական հնարավորություն է` Հայաստանում ընտրությունների միջոցով իշխանություն փոխելու։
Ցավոք խոհեմությունը Փաշինյանի հետ կապ չունեցող հեռավոր գաղափար է, ու թեպետ դադարել եմ որևէ բանից զարմանալ, բայց եթե ընտրություններում պարտվող Փաշինյանը խաղաղ և անցնցում իշխանությունը փոխանցի ընտրվող ուժին, դա ինձ համար իսկապես զարմանալի կլինի»։