Պարեկների կողմից ուժի կիրառումը պետք է բացառիկ միջոց լինի, բայց այդ պարագայում էլ պետք է ապացուցվի, որ իրենք իրավախախտում են վերացնում, ոչ թե ուղղակի խոչընդոտ, ArmeniaSputnik–ի հետ զրույցում ասել է ՀՀ նախկին փոխոստիկանապետ Հովհաննես Քոչարյանը` մեկնաբանելով համացանցում տարածված տեսանյութը, որտեղ պարեկները վարորդին հանում մեքենայից, գցում գետնին և բռնի կերպով բերման ենթարկում։
«Տվյալ տեսանյութը նայելիս ստեղծվում է հակառակ տպավորություն` իրավախախտում առկա չի եղել, ու նմանատիպ հարցերի պատասխանները պետք է ծառայողական քննությամբ տրվեն։ Չեմ հասկանում, թե ինչ վտանգ են չեզոքացրել, ու ինչու է ֆիզիկական ուժը եղել ծայրահեղ կամ բացառիկ միջոց»,– նշել է Քոչարյանը։
Նրա խոսքով` պարեկների պրոֆեսիոնալ ուսուցման մեջ կա լրջագույն բաց։ Հատկապես ուժի կիրառման մասով լրջագույն խնդիր է առկա։ Պարեկային ծառայությունը պետք է կոմպլեկտավորվեր բացառապես բարձրագույն կրթություն ունեցող անձանցից, իսկ այժմ կրթական ցենզը ցածր է, ու մարդիկ առանց համապատասխան գիտելիքների կարողանում են ներթափանցել այդ ծառայություն։
