Ռուսաստանի նախագահ Վլադիմիր Պուտինը Հայաստանի վարչապետ Նիկոլ Փաշինյանի հետ դեռ չի քննարկել ՀԱՊԿ-ին Հայաստանի մասնակցությունը սառեցնելու մասին նրա հայտարարությունը: Այս մասին ասել է Ռուսաստանի նախագահի խոսնակ Դմիտրի Պեսկովը, հաղորդում է ТАСС-ը:

«Ոչ, այս պահին որևէ շփում չկա և չի եղել, սակայն աշխատանքային շփումների շրջանակներում, իհարկե, մենք ակնկալում ենք մեր հայ գործընկերների կողմից պարզաբանում: Ուստի մենք կշարունակենք մեր երկխոսությունը Երևանի հետ»,- նշել է Պեսկովը:

Թարմացված․ Հայաստանի ղեկավարությունը դավաճանել է Ռուսաստանին՝ սառեցնելով իր մասնակցությունը ՀԱՊԿ-ին: Այս մասին Telegram-ի իր ալիքում գրել է քաղաքագետ Սերգեյ Մարկովը:

«Այժմ Հարավային Կովկասում Մոսկվայի գլխավոր բարեկամն Ադրբեջանն է դառնում: Հայաստանի վարչապետ Նիկոլ Փաշինյանը և Ֆրանսիայի նախագահ Էմանուել Մակրոնը բանակցություններից հետո դավադրություն են կազմակերպել Ռուսաստանի դեմ, որի նպատակն է վտարել Ռուսաստանին Հարավային Կովկասից, և այնտեղ ֆրանսիական ռազմաբազաներ տեղակայել»,- գրել է Մարկովը:

Ավելի վաղ ՀՀ վարչապետը հայտարարել էր, որ Հայաստանը «սառեցրել է» իր մասնակցությունը ՀԱՊԿ-ին:

Թարմացված․ Քաղաքագետ Ստեփան Դանիելյանը ֆեյսբուքյան իր էջում գրում է․ «Սկզբից ՀԱՊԿ-ի անդամ երկրները ՆԱՏՕ-ի անդամ Թուրքիայի հետ ռազմական համագործակցության ծրագրեր են սկսում, զորախաղեր են անցկացնում, թուրքական մասնակցությամբ ռազմական գործարաններ են կառուցում, թյուրքական պետությունների կոնֆեդերցիա են սկսում ձևավորել: ՀԱՊԿ-ին չանդամակցող Ադրբեջանը այդ երկրների միջոցով ազդում է ՀԱՊԿ-ի ներքին որոշումների վրա, իսկ 2025 թվականին Թուրքիան և Ադրբեջանն, ըստ էության, արդեն պաշտոնապես միավորված ռազմական ուժեր են ունենալու:
Այս նախադեպից հետո ՀԱՊԿ-ի անդամ Հայաստանը նմանատիպ հարաբերություններ է ստեղծում ՆԱՏՕ-ի անդամ Ֆրանսիայի հետ:
Մյուս կողմից ՆԱՏՕ-ի անդամ երկրներում կան տարբեր մոտեցումներ ռուս-ուկրաինական պատերազմի հանդեպ, մասնավորապես Հունգարիան խոչընդոտում է Ուկրաինային տրամադրվող օգնություններին, այդ ճանապարհով է շարժվում Սլովակիան, իսկ ապագա ընտրություններից հետո ամրապնդվող աջերի ապագա պահվածքը դժվար է կանխատեսել: Անհասկանալի է նաև, թե ԱՄՆ-ն իրեն ինչպես կպահի նախագահական ընտրություններից հետո:
Եզրակացությունը մեկն է, ՀԱՊԿ, ՆԱՏՕ, ԵԱՀԿ և նմանատիպ կազմակերպություններն արդեն անցյալի մնացուկներ են և հին գինին նոր տակառների մեջ լցնել չի ստացվում»: