Ռուսաստանի նախագահ Վլադիմիր Պուտինը հեռախոսազրույց է ունեցել Ադրբեջանի նախագահ Իլհամ Ալիևի և ՀՀ վարչապետ Նիկոլ Փաշինյանի հետ, որի ընթացքում քննարկել է Լեռնային Ղարաբաղի վերաբերյալ համաձայնագրերի կատարման ասպեկտները, հաղորդում է Կրեմլի մամուլի ծառայությունը:
«Ռուսաստանի Դաշնության նախագահ Վլադիմիր Պուտինի՝ Ադրբեջանի Հանրապետության նախագահ Իլհամ Ալիևի և ՀՀ վարչապետ Նիկոլ Փաշինյանի հետ հեռախոսային պարբերական հերթական շփումներից մեկի ընթացքում քննարկել են նոյեմբերի 9-ին Լեռնային Ղարաբաղի վերաբերյալ եռակողմ հայտարարության մեջ արձանագրված համաձայնագրերի կատարման գործնական ասպեկտները: ՌԴ նախագահը գոհունակություն է հայտնել, որ հրադադարը դիտարկվում է, և շփման գծում իրավիճակը բավականին հանգիստ է», - ասվում է հաղորդագրության մեջ:
«Իլհամ Ալիևի հետ զրույցում, մասնավորապես, Վլադիմիր Պուտինը ուշադրություն է հրավիրել այն փաստի վրա, որ քրիստոնեական եկեղեցիներն ու վանքերը գտնվում են այն շրջաններում, որոնք վերադարձվում են Ադրբեջանի Հանրապետությանը` համաձայն եռակողմ հայտարարության: Այդ կապակցությամբ նա շեշտել է այդ սրբավայրերի անվտանգության և բնականոն եկեղեցական կյանքի ապահովման կարևորությունը», - ասվում է հաղորդագրության մեջ: Նշվում է, որ Ադրբեջանի նախագահն այս առումով փոխըմբռնում է ցուցաբերել և ասել, որ ադրբեջանական կողմը կաշխատի այս ուղղությամբ:
