Ռուսաստանի ու Թուրքիայի առաջնորդներն այսօր հեռախոսազրույց են ունեցել և մանրամասն քննարկել Ղարաբաղում ստեղծված իրավիճակը։
Ըստ Կրեմլի հաղորդագրության, Վլադիմիր Պուտինը հույս է հայտնել, որ Անկարան, որպես ԵԱՀԿ Մինսկի խմբի անդամ, կառուցողական դեր կստանձնի հակամարտության կարգավորման գործընթացում։
«Երկու կողմն էլ կարևորել է հոկտեմբերի 10-ից մարդասիրական հրադադար հաստատելու մասին՝ Մոսկվայում ձեռք բերված պայմանավորվածության իրագործումը։ Վլադիմիր Պուտինն ու Ռեջեփ Թայիփ Էրդողանը հանդես են եկել հակամարտության քաղաքական կարգավորումն ակտիվացնելու օգտին՝ Մինսկի խմբի առաջարկների հիման վրա», - հաղորդում է Ռուսաստանի նախագահական նստավայրը։
Նշվում է նաև, որ Ռուսաստանի նախագահը լուրջ մտահոգություն է հայտնել ռազմական գործողություններում մերձավոր Արևելքից գրոհայիններ ներգրավելու վերաբերյալ և ընդգծել արյունահեղությունը շտապ դադարեցնելու և խաղաղ կարգավորմանն անցնելու ուղղությամբ ջանքերը համախմբելու ծայրահեղ անհրաժեշտությունը։
Հաղորդվում է, որ հեռախոսազրույցը կայացել է Թուրքիայի նախագահի նախաձեռնությամբ։
