«Էսքան ոստիկաններ ինչո՞ւ են այստեղ, ահաբեկելու համա՞ր. մեզ ոչ ոք չի կարող ահաբեկել, սա բոլորի ականջներին պետք է օղ լինի»,- ՔԿ-ի դիմաց կանգնած ոստիկանական մի քանի շարքերը մատնացույց անելով՝ ասաց Բագրատ Սրբազանը։
«Մենք առավել զսպվածություն պետք է ցուցաբերենք, որ էն մարդուն հաճույք չպատճառենք, էդ մարդու սիրտը արյուն է ուզում։ Ես այդ արյուն ցանկանալու դեպքերը Իջևանում տեսել եմ»,- նշեց նա՝ նկատի ունենալով Նիկոլ Փաշինյանին։ «Ասեմ էդ մարդուն՝ մի՛ հուզվիր, քեզ էդ հաճույքը չենք պատճառելու. հեծանիվ քշելուց ու պաղպաղակից բացի արյուն է ուզում մենյուի մեջ»,- հավելեց Սրբազանը։

***

«Պարո՛ն Քյարամյան, եթե չեք ուզում, մի իջեք ձեր բարձունքից, մի օր մենք ինքներս կբարձրանանք այդտեղ»,-ՔԿ-ի դիմաց ասաց Բագրատ Սրբազանը։
Հիշեցնենք, որ նա պահանջել էր, որպեսզի ՔԿ նախագահը կամ որևէ պաշտոնյա իջնեն և իրենց հարցերին պատասխանեն: Հայտնել էին, որ ոչ ոք չի իջնելու, պետք է դիմում ներկայացվի և ըստ ընթացակարգի՝ ընդունելություն կազմակերպվի։ «Ես չեմ ուզում վերև բարձրանալ։ Պարոն Քյարամյանը կամ ՔԿ այլ ներկայացուցիչ կիջնի ու կլսի մեր պահանջները, կամ հետագայի համար մենք չենք կարող պատասխան տալ։ Մենք համբերությամբ սպասում ենք, մյուս անգամ հետներդ շատ թուղթ բերեք, որ տեղում դիմում գրեք, հանձնեք մարդու որդուն»,- ասաց Բագրատ Սրբազանը։

***

«ԱԳՆ շենքի մոտից ձերբակալվածներից ոչ ոքին մեղադրանք չի առաջադրվել, նշանակում է՝ ժամը 3-ից 5-ը բոլորն ազատ կարձակվեն։ Այդ կետով մեր պահանջը համարում եմ կատարված և այդ կետով անաչառության համար ուզում եմ գնահատել Քննչական կոմիտեի կամ այն մարմնի, որն աշխատում է այս ուղղությամբ, աշխատանքը»,- հայտարարեց Բագրատ Սրբազանը՝ պահանջելով, որպեսզի ՔԿ-ն վարույթ սկսի նրանց նկատմամբ, ովքեր 10 հոգով ծեծել են Աշոտ Սիմոնյանին, Աշոտ Հարությունյանին, Արման Սարգսյանին, Կարեն Գևորգյանին, Արսեն Գրիգորյանին, Դանիել սարկագավին, Հրայր սարկավագին ու մյուսներին։
Բագրատ Սրբազանի գլխավորությամբ երթը շարժվեց դեպի Սուրբ Աննա եկեղեցու բակ։