Քաղաքական շրջանակներում հայտնվել է մի ձայնագրություն, որը որոշակի հստակություն է մտցրել «Ժառանգության» եւ «Ազատ դեմոկրատների» շուրջ ծավալվող վերջին իրադարձությունների մեջ¦ գրում է «Չորրորդ ինքնիշխանությունը»։
Թերթը հիշեցնում է, որ Հայաստանում ամերիկյան դեսպանատան ակտիվ լոբբինգի արդյունքում, հետևաբար՝ ամերիկյան ֆինանսական միջոցներով, ստեղծվեց ընդդիմադիր այլընտրանքային դաշինք՝ «Ժառանգության» և «Ազատ դեմոկրատներ» կուսակցության՝ խորհրդարանական ընտրություններին մասնակցելու ընդհանուր ցուցակով։
«...Ամերիկյան կողմից իրականացվող տեղեկատվական արտահոսքերի համաձայն՝ ամերիկյան կողմն ունեցել է Րաֆֆի Հովհաննիսյան եւ Խաչատուր Քոքոբելյան առանձնազրույցի ձայնագրությունը։ Ըստ ինֆորմացիոն արտահոսքի՝ Րաֆֆի Հովհաննիսյանն ասել է, թե ինքը խնդիր ունի խորհրդարանական ընտրություններին հանդես գալ նոր թիմով, եւ որ հին թիմն իրականացրել է իր առջեւ դրված խնդիրները։
Խաչատուր Քոքոբելյանն էլ իր հերթին հավանության է արժանացրել Հովհաննիսյանի այս նախաձեռնությունը՝ նշելով, որ նոր «Ազատ դեմոկրատները» նոր դեմքեր ունեն եւ կարող են «վարձակալության հիմունքներով» նրանց տրամադրել «Ժառանգությանը» ։ Պարզապես առանձնազրույցի շրջանակներում պայմանավորվածություն է եղել, որ իրենք՝ Հովհաննիսյանն ու Քոքոբելյանը՝ որպես ծանր հրետանի պետք է մտնեն ԱԺ, հետո նախագահականին ընդառաջ վայր դնեն մանդատներն ու զբաղվեն նախագահական ընտրություններով։
Արդյունքում ամերիկացիները նպատակ չեն ունեցել Րաֆֆի Հովհաննիսյանից նախագահացու ստանալ, եւ հենց այստեղ է, որ «խաղաքարտերը խառնվել են իրար...»,- գրում է «Չորրորդ ինքնիշխանությունը»։
