Քիչ առաջ Ռոբերտ Քոչարյանի պաշտպաններից Հայկ Ալումյանը լրագրողներին հայտնեց, որ ՀՀ երկրորդ նախագահ, «Մարտի 1»-ի գործով մեղադրյալ Ռոբերտ Քոչարյանի նկատմամբ կալանավորման որոշումն անձեռնմխելիության հիմքով վերացնելու վերաբերյալ բողոքի քննության նիստը հետաձգվել է. «Դատական նիստը հետաձգվեց, որևէ նոր բան տեղի չի ունեցել, ես ներկայացնում էի իմ բողոքը, որը չհասցրեցի ավարտել»,-ասել է պաշտպանը:
Հայկ Ալումյանը հայտնեց, որ հաջորդ դատական նիստը նշանակվել է դեկտեմբերի 3-ին՝ ժամը 11:00-ին:
Հիշեցնենք, որ Վճռաբեկ դատարանը բավարարել էր գլխավոր դատախազության բողոքը և Քոչարյանի խափանման միջոցը կալանք ընտրելու հարցի քննությունն ուղարկել Վերաքննիչ դատարան:
Դատախազությունը պահանջում էր, որ Վճռաբեկ դատարանը բեկանի Վերաքննիչ դատարանի որոշումը և ուժի մեջ թողնի առաջին ատյանի դատարանի կողմից հուլիսի 27-ին կայացված որոշումը, որով 1998-2008թթ. ՀՀ նախագահի պաշտոնը զբաղեցրած Ռոբերտ Քոչարյանի նկատմամբ խափանման միջոց էր ընտրվել կալանքը:
