2015թ-ի հոկտեմբերի 18-ին Սադախլոյի վրացական անցակետում հուշարձանագետ Սամվել Կարապետյանի Վրաստան կատարած այցը խափանվել է։ Նա հայտնվել է Վրաստանի համար «անցանկալի անձ» ցուցակում:
«Հայտնի է, որ այնտեղ վիթխարի մշակութային ժառանգություն ունենք, ուստի իրականացնում էինք մեր հերթական ուսումնասիրական ճամփորդությունը: Դեռևս 2011 թվականին SOS մշակույթ ծրագրի շրջանակներում, որը հովանավորվում էր Եվրախորհրդի կողմից, Հայաստանի ու Վրաստանի մասնագետները պետք է ուսումնասիրեն երկու երկրների սահմանին մոտ գտնվող բնակավայրերի մերձակա հուշարձանները:
Այդ ծրագրից հետո, երբ այցելում էի Վրաստան, ամեն անգամ 15-20 րոպե ձգձգում էին ստուգումը: Իսկ հոկտեմբերի 18-ին, երբ մեր ամբողջ խումբն արդեն անցել էր, մնացել էի ես ու այս անգամ ավելի շատ պահեցին, մոտ 35 րոպե: Հետո մոտեցավ անվտանգության աշխատակիցն ու ասաց, որ չեմ կարող անցնել, և այն հարցին, թե ո՞րն է պատճառը, ասացին, որ չեն կարող պատասխանել:
Հաջորդ օրը նամակ գրեցի ՀՀ-ում Վրաստանի դեսպանին ու մինչ օրս պատասխան չեմ ստացել: Նամակ հղեցի նաև ՀՀ ԱԳՆ-ին.պատասխանեցին որ բարձր են գնահատում իմ աշխատանքը»,-այսօր՝ լրագրողների հետ հանդիպման ժամանակ ասաց Սամվել Կարապետյանը:
Հուշարձանագետը վստահ է՝ իր գործունեությունն է Վրաստանի համար անցանկալի անձ դառնալու պատճառը.
«Դեռևս 1995 թվականին մի բրոշյուր հրատարակեցի, որտեղ 650 հայկական եկեղեցիների ցանկն էր՝ համառոտ տեղեկություններով: Սրանից հետո վրացական լրատվամիջոցները սկսեցին գրել, թե սա զեղծարարություն է.ի՞նչ է նշանակում 650 հայկական եկեղեցի՝ Վրաստանում: Վերջերս գիրք են հրապարակել, բայց հետին թվով, թե սրանք վրացական են: Անգամ նորացրել են բոլոր եկեղեցիների դարերը»,-նշեց Սամվել Կարապետյանը:
Հուշարձանագետն ահազանգում է՝ Վրաստանը հայկական մշակութային ժառանգության ոչնչացման պետական քաղաքականություն է վարում.
«Քերում են արձանագրություններն ու որմնանկարները, ձևում ու օծում վրաց սրբերից մեկի անունով»:
Անի Կարապետյան
