Սամվել Կարապետյանի գործով դատական նիստը հետաձգվեց, այն կվերսկսի ապրիլի 17-ին։ Կարապետյանին ոստիկանների ուղեկցությամբ հատուկ մեքենայով տարան դատարանից։

«Այսօրվա գլխավոր հարցն այն է, թե արդյո՞ք Սամվել Կարապետյանը նախընտրական քարոզարշավին լինելու է բոլոր քաղաքներում, գյուղերում»,- Սամվել Կարապետյանի գործով դատական նիստից հետո հայտարարեց «Ուժեղ Հայաստան» կուսակցության խորհրդի անդամ Նարեկ Կարապետյանը։ «Դատախազությունը ցանկանում է 3 ամսով երկարացնել տնային կալանքը․ այս ամբողջ պրոցեսի նպատակն այն է, որ խոչընդոտեն Կարապետյանին շփվել ժողովրդի հետ, որովհետև գիտեն՝ երբ Կարապետյանը սկսի Հայաստանի քաղաքներով, գյուղերով գնալ՝ ժողովուրդը կտեսնի, կհավատա, հույս կունենա և այդ հույսը կբերի մեծ փոփոխություն»,- շարունակեց Նարեկ Կարապետյանը՝ հույս հայտնելով, որ «դատավորը, լինելով հայ մարդ, կանի հային վայել հետևություններ»։

Հակակոռուպցիոն դատարանում ընթանում է Սամվել Կարապետյանի գործով դատական նիստը, որտեղ կքննվի խափանման միջոցի փոխման հարցը։

Հիշեցնենք, որ Սամվել Կարապետյանը ձերբակալվել էր 2025թ․ հունիսի 18-ին, այնուհետև դատարանի որոշմամբ՝ կալանավորվել։ Այժմ նրա նկատմամբ որպես խափանման միջոց կիրառված է տնային կալանքը։

***

Սամվել Կարապետյանի դատական նիստը չի տեսանկարահանվի. Հակակոռուպցիոն դատարանում մեկնարկել է Կարապետյանի գործով դատական առաջին նիստը

«Ուժեղ Հայաստան» կուսակցության առաջնորդի պաշտպանները միջնորդեցին, որ դատական նիստը չնկարահանվի և չհեռարձակվի։ Միջնորդությունն ընդունվեց։

***

Սամվել Կարապետյանը հայտարարել է, որ սկսել է Հայաստանի քաղաքացիությունից բացի բոլոր այլ քաղաքացիություններից հրաժարվելու գործընթացը

«Քանի որ մասնակցում եմ ընտրություններին և վստահ եմ իմ հաղթանակի հարցում, որոշում եմ կայացնել սկսել այդ անձնագրերից հրաժարվելու գործընթացը», - ասել է նա դատական առաջին նիստի ժամանակ։

Դիտեք նաև՝ 

Ոստիկանության գվարդիան Սամվել Կարապետյանի դատի մեկնարկից առաջ մեծաքանակ ուժեր է կենտրոնացրել Հակակոռուպցիոն դատարանի մոտ

***

«Հույս ունենք, որ վերջիվերջո որևէ դատավոր կցանկանա արդարությունը վերականգնել և մեր հասարակությունը հնարավորություն կստանա շփումներ ունենալ հենց Սանվել Կարապետյանի հետ ու կարծում եմ՝ մեր իշխանությունները հենց դրանից են վախենում»,- Հակակոռուպցիոն դատարանի բակում, որտեղ ընթանում է Սամվել Կարապետյանի գործով դատական նիստը, լրագրողների հետ զրույցում ասաց «Ուժեղ Հայաստան» կուսակցության անդամ Ռուբեն Վելիցյանը։ «Իշխանությունները հասկանում են, որ Սամվել Կարապետյանը, եթե ազատ լինի, շատ մեծ կոնսոլիդացիա կլինի նրա շուրջ»,- նշեց նա։

***

«Մեր կողմից կազմակերպված հանրահավաքը շատ ծանր է նստել իշխանության վրա և հասկացել են, որ մեր քաղաքական ուժն իսկապես ուժեղ է։ Ինչ ուզում է լինի, ուզում են մեր կուսակցության բոլոր անդամներին էլ ձերբակալեն՝ միևնույն է, թասիբով հայ ժողովուրդը մեր կողքին կանգնած է»,- Հակակոռուպցիոն դատարանի բակում հաջակցություն Սամվել Կարապետյանի հավաքի ժամանակ ասաց կուսակցության անդամ Գոհար Ղումաշյանը՝ շնորհակալություն հայտնելով երեկ իր ձերբակալման հետ կապված հանրության աջակցության համար։