Վարչապետ Նիկոլ Փաշինյանի մոտ քննարկվել է թվայնացման օրակարգը և այդ հարցի տեսլականի իրականացման ընթացքը:
Նիկոլ Փաշինյանն ընդգծել է, որ թվայնացումը ՀՀ կառավարության կարևորագույն խնդիրներից մեկն է և թվայնացումը, մեծ հաշվով, ՀՀ քաղաքացիների կյանքի որակի ու հանրային ծառայությունների մատուցման որակի կարևորագույն բաղադրիչ է:
Մանրամասն՝ տեսանյութում:
Նշենք նաև, որ Նիկոլ Փաշինյանի մոտ տեղի է ունեցել նաև մեկ այլ խորհրդակցություն, որի ընթացքում ներկայացվել է Հայաստանի պետական հետաքրքրությունների ֆոնդի (ANIF) գործունեության հաշվետվությունը, քննարկվել ֆոնդի հետագա անելիքները:
Վարչապետին զեկուցվել են ֆոնդի բյուջեի և ծախսերի, ներդրումների ներգրավման, ռազմավարական առաջադրանքների կատարման, ներկայումս քննարկվող կոնկրետ ներդրումային ծրագրերի իրականացմանն ուղղված քայլերի մասին:
Ներկայացվել են վերականգնվող էներգետիկայի, շինարարության, թեթև արդյունաբերության, սննդի արդյունաբերության, գյուղատնտեսության, առողջապահության և այլ ոլորտներում կոնկրետ ծրագրերի իրականացման ուղղությամբ ներդրողների հետ տարվող աշխատանքների, ֆինանսական միջոցների ներգրավման ուղղությամբ իրականացվող քայլերը:
Զեկուցվել է, որ ANIF-ն «Ուղղակի ներդրումների ռուսական ֆոնդի» հետ համաձայնության է եկել համատեղ ֆոնդ ստեղծելու շուրջ, սկսվել է Աբու Դաբիում, Մոսկվայում և Փարիզում ANIF-ի ներկայացուցչությունների գրանցման գործընթացը:
Վարչապետը կարևորել է ֆոնդի արդյունավետ գործունեությունը վերը նշված ուղղություններով և կարևորել պրոֆեսիոնալ ներդրողների ներգրավումը մեր երկիր: