Ucom ընկերությունն արդեն նոր տնօրեն ունի: Այսօր ժամը 13:00-ից մինչև 22:00-ը տեղի է ունեցել Ucom ընկերության տնօրենների խորհրդի նիստը, որտեղ քննարկվել է ընկերության աշխատակիցների մասսայական ազատման դիմումների հարցը։
Այս մասին տեղեկացնում է factor.am-ը:
Ընդունվել է Ucom ընկերության տնօրենի պաշտոնից Հայկ Եսայանի ազատման դիմումը և նշանակվել է նոր տնօրեն, որի անունն առայժմ խիստ գաղտնի է պահվում: Հայտնի է, որ նա «Բիլայն» ընկերության ներկայիս տնօրեն Անդրեյ Պյատախինը չէ:
Հավելենք, որ Ucom ընկերության շուրջ իրադարձությունների հետ կապված ընկերության հիմնադիրներ Հայկ և Ալեքսանդր Եսայան եղբայրները տարածել են հայտարարություն:
Հայկ Եսայանը հաստատում է երեկ շրջանառված լուրը, որով նա դիմում էր ներկայացրել իր աշխատանքային պարտականությունների դադարեցման մասին, որից հետո հարյուրավոր աշխատակիցներ սկսել էին աշխատանքից ազատման դիմումներ գրել: Այժմ 576 հոգի փաստացի դիմում է գրել, այդ թվում գրեթե ողջ ղեկավար անձնակազմը, ղեկավարների միջին օղակը և ողջ տեխնիկական թիմը: Չնայած դրան, արդեն փաստացի աշխատանքից ազատման դիմում ներկայացրած աշխատակիցները շարունակում են անխափան պահել ծառայությունների հասանելիությունը` հատկապես հաշվի առնելով արտակարգ դրությունը երկրում և կապի կարևորությունը մեր օրերում: Ստեղծված իրավիճակը ծագել է բաժնետերերի միջև հակասությունների պատճառով:
Եղբայրները, որոնք ընկերության հիմնադիրներն են և ընկերության 5,94% բաժնետերերը, առաջարկ են արել մյուս սեփականատերերին ձեռք բերելու մնացած բաժնետոմսերը: 94,06% բաժնետոմսերի համար առաջարկ է արվել վճարել 22մլրդ 100 մլն դրամ գումար:
Հայկ Եսայանը հայտնեց, որ նպատակ ունեն հնարավորություն տալ ընկերության աշխատակիցներին արտոնյալ պայմաններով ձեռք բերել հետ գնված բաժնետոմսերի 20%-ը և դառնալ կազմակերպության համասեփականատերեր:
