Հիշեցում Asekose.am-ի կողմից` բլոգերների ու համացանցի օգտատերերի գրառումները ներկայացվում են առանց խմբագրման:

 Բաց նամակ Նիկոլ Փաշինյանին

Մեծարգո պարոն վարչապետ.
Ձեզ դիմելու անհրաժեշտությունը պայմանավորված այն հանգամանքով, որ խնդիրը, որը գտնվում է ՀՀ հանրային ծառայությունները կարգավորող հանձնաժողովի կարգավորման դաշտում, չի ստանում համապատասխան լուծում, ավելին այն ձախողվում է հենց հանձնաժողովի կողմից: Նկարագրեմ իրավիճակը.
Հաշվի առնելով «Վեոլիա Ջուր» ՓԲԸ-ի կողմից ջրաչափերի փոխարինման գործընթացում տեղ գտած թերությունների արդյունքում բնակիչների բազմաթիվ բողոքները «Իրավաբանների և հոգեբանների ասոցիացիա» հասարակական կազմակերպությունը ամիսներ առաջ կազմակերպել էր խնդրի ինքնուրույն ուսումնասիրություն և դիմելով ՀՀ հանրային ծառայությունները կարգավորող հանձնաժողովին առաջարկել էր ընդունել որոշում բնակչության ոտնահարված իրավունքները վերականգնելու համար: Արդյունքում կայացվեց ՀՀ հանրային ծառայությունները կարգավորող հանձնաժողովի 23.05.2018թ. հ.167Ա որոշումը (կցվում է), որի 2-րդ կետում բառացի շարադրված է.
« 2. Մատակարարին՝ սույն որոշումն ուժի մեջ մտնելու պահից․
1) Երկշաբաթյա ժամկետում սույն որոշման 1-ին կետում նշված գումարը 900005001343 hաշվեհամարով փոխանցել Հայաստանի Հանրապետության պետական բյուջե.
2) երկամսյա ժամկետում ուսումնասիրել 2017 և 2018 թվականների ընթացքում իրականացված վերահաշվարկների փաստաթղթերը և, բոլոր այն դեպքերում, երբ՝
ա. վերահաշվարկը պայմանավորված է միայն հոլոգրաֆիկ կնիքի վրա արտաքին միջամտության առկայությամբ, և կանոնների 2-րդ կետի 16-րդ ենթակետով սահմանված խախտումներ չեն հայտնաբերվել` չեղարկել վերահաշվարկները, վերադարձնել բաժանորդներից գանձված գումարները և չեղարկված վերահաշվարկների ցանկը ներկայացնել հանձնաժողով.
բ. Կանոնների 35-րդ կետի համաձայն առևտրային հաշվառքի սարքի ապահավաքակցման արձանագրություն չի կազմվել, Կանոնների 56-րդ կետի 1-ին ենթակետով սահմանված կարգով և չափով վճարել տուժանքը և վճարված տուժանքների ցանկը ներկայացնել Հանձնաժողով.
գ․ փորձագիտական եզրակացությամբ չի փաստվել, որ խախտումը արտաքին միջամտության հետևանք է, սակայն վերահաշվարկը կատարվել է Կանոնների 47-րդ կետով սահմանված կարգով՝ ճշգրտել կատարված վերահաշվարկները՝ ըստ Կանոնների 46-րդ կետի 2-րդ ենթակետի, և ճշգրտված վերահաշվարկների ցանկը ներկայացնել հանձնաժողով։»

Որոշումն ընդունվեց, թվում էր թե արդարությունն ու օրինականությունը վերականգնվեց (իրավական երկրում և իրեն հարգող պետական մարմնում նման որոշումը պետք է կայացվեր ոչ թե հասարակական կազմակերպության նախաձեռնությամբ, այլ ընդհանրապես պետական մարմինը չպետք է թույլ տար նման իրավիճակի ստեղծում), անցավ երկու ամիսը և ինչպես միշտ եղել է մեր իրականության մեջ որոշման պահանջի կատարումը մնաց օդից կախված: «Վեոլիա Ջուր» ՓԲԸ-ի մոտ հայտնվեց մեր մյուս պետական մարմին կոչվածի՝ Չափագիտության ազգային ինստիտուտի ինչ-որ գրություն, որով հիմնավորումներ և մեկնաբանություններ են տրվում արդեն իսկ կատարված ստուգաչափումների ու լաբորատոր փորձարկումների եզրակացություններին: Նշեմ որ երբ ընթերցում ենք որոշումից մեջբերված գ. Ենթակետը, այնտեղ սևը սպիտակով պարզ գրված է. « գ․ փորձագիտական եզրակացությամբ չի փաստվել, որ խախտումը արտաքին միջամտության հետևանք է……. ։» և ոչ թե հետին թվով ինչ- որ գրությամբ:
ՀՀ հանրային ծառայությունները կարգավորող հանձնաժողովը չի հետևում իր իսկ որոշման կատարմանը, իսկ արդյունքում Հայաստանի Հանրապետության հազարավոր քաղաքացիներ կրկին հայտնվեցին անօրինականության դաշտում, իսկ «Վեոլիա Ջուր» ՓԲԸ-ն վերահաշվարկ կոչված տուգանքի տեսքով Հայաստանի Հանրապետության քաղաքացիների գրպանից կգողանա միլիարդների հասնող գումար, ինչը ապագայում կամ գուցե արդեն իսկ եղբայրաբար կբաշխվի մասնակիցների և գործի մեջ ջանք ու եռանդ ներդնողների միջև:
Ստացվում է, որ իրավասու պետական մարմինն անզոր է անբարեխիղճ տնտեսվարողին կարգի հրավիրել: Կամ էլ կարող է, բայց հանցավոր անգործությունն ավելի ձեռնտու է նրա համար:

Հարգելի պարոն վարչապետ: Այս պատմության զավեշտն այն է, որ այս ամենը կատարվում է այն ժամանակահատվածում, երբ ամեն օր լսում ենք նախկինում կատարված իրավախախտումների մասին նոր բացահայտումներ, երբ մեր պետությունը քաղաքացիներին զիջում է երթևեկության իրավախախտումների, վարկերի և այլ բնույթի տույժ-տուգանքներ, իսկ այստեղ հասունանում է նոր իրավիճակ, երբ ՀՀ քաղաքացին կրկին իրեն զգում է նվաստացած, իրավունքները ոտնահարված, անպաշտպան.....
Խնդիրը ունի նաև այլ ասպեկտ: Ինչպես գիտենք ջրաչափերը հիմնականում տեղադրվել են 2000-ական թվականներին, որոնց շահագործման ժամկետը ՀՀ կառավարության որոշումներով մի քանի անգամ երկարացվել է և աստված գիտի նախորդ ջրամատակարարների օրոք դրանց գլխով ինչ «փորձություններ» են անցել, հիմա 1,5 տարի է եկել է նորը, ով նախորդների իրավահաջորդը չէ, սակայն 15-ից ավել տարիներ շահագործված ջրաչափի ինչ-ինչ խախտումների համար գումարներ է հավաքագրում: Անհասկանալի է, եթե նույնիսկ այդ գումարները պետք է հավաքվեն, ինչու ոչ պետական բյուջե, իսկ քիչ թե շատ քաղաքացիական զգացողություն ունեցող պաշտոնյան ուղղակի այս ամենը կզրոյացներ.....

Հավելեմ նաև, որ իմ և կազմակերպության անդամների բնակարանների ջրաչափերը առայժմ չեն փոխարինել և չեն ստուգաչափել:
Մեծարգո պարոն վարչապետ: Ոլորտում տիրող իրավիճակի վերաբերյալ մեր կատարած ուսումնասիրությունները ցույց են տվել, որ «Վիոլա ջուր» ՓԲԸ –ն, օգտվելով շուկայում իր մենաշնորհային դիրքից, բազմիցս կատարել ու շարունակում է կատարել չարաշահումներ: Այս ամենը երբևէ ուշադրության չի արժանացել ջրային կոմիտեի, տեղական ինքնակառավարման մարմինների, տնտեսական մրցակցության պաշտպանության պետական հանձնաժողովի, իրավապահ համակարգի և այլ իրավասու պետական մարմինների կողմից, ինչը վկայում է, որ ոլորտը լրիվությամբ բացիթողի վիճակում է, առկա են կոռուպցիոն ռիսկեր:

Ասվածիս վկայությունն է նաև Երևանի Խ. Դաշտենցի փողոցի մի զգալի հատվածում տիրող անմխիթար իրավիճակը: Տարիներ շարունակ Երևանի Խ. Դաշտենցի փողոցի 8 - 32 համարների բնակելի տները շուրջ 8 ամիս է, ինչ ջրի մեջ են: Պարզել ենք, որ խմելու ջրի խողովակը վնասված է մոտ 150 մետր երկայնքով, ջուրը հոսում է մարդկանց տները, նկուղները մշտապես լցված է ջրով, բնակիչները օրեկան 8 ժամ ջրի պոմպեր են միացնում, որպեսզի ջուրը նկուղներից չբարձրանա տան մակարդակին, դուռ-լուսամուտ բաց են թողնում, որպեսզի խոնավությունից շնչահեղձ չլինեն: Կատարել ենք տեղատեսություն, տեղերում կատարել ենք նկարահաներ , փաստը արձանագրել ենք, համապատասխան փորձագիտական մարմինների կողմից վերցվել են ջրի փորձանմուշներ:

Վերը նշված հրատապ խնդիրների մասին ահազանգել ենք ջրային կոմիտե, «Վիոլա ջուր» ՓԲԸ, տնտեսական մրցակցության պաշտպանության պետական հանձնաժողով, հանրային ծառայությունները կարգավորող պետական հանձնաժողով, ՀՀ դատախազություն, բայց ոչ մի արդյունք: Օրը ցերեկով մեր բոլորի աչքի առաջ մարդկանց տները քանդվում են, նրանց նկատմամբ անհիմն կերպով տուգանքի ակտեր են կազմվում, բայց պատասխան տվող չկա: 
Ելնելով վերոգրյալից խնդրում եմ ստուգել իմ կողմից ներկայացված փաստերը, հանձնարարել պետական իրավասու մարմիններին գործին տալ ճիշտ ընթացք:
Շնորհակալություն:
Հարգանքով՝ 
Կազմակերպության նախագահ Խաչատուր Մարոզյան