Առողջության համընդհանուր ապահովագրության համակարգի գործարկումից հետո բժիշկները ստացել են աշխատավարձը ոչ միայն ուշացումով, այլև բավականին ցածր։ ԱԺ-ի մոտ բողոքի ակցիայի ժամանակ հայտարարեց «Առողջության իրավունք» ՀԿ-ի համահիմնադիր Անուշ Պողոսյանը։
«Հիվանդանոցային բլոկի աշխատողները ստացել են շուրջ 30 տոկոսով ցածր աշխատավարձեր, իսկ պոլիկլինկաներում՝ երբեմն 2-3 անգամ ցածր։ Այս կառույցում շատ ավելի ցածր ստացել են բուժքույրերը, մայրապետերը, քանի որ բժիշկներն ու բուժքույրերը սովորաբար վարձատրվում էին պերկապիտալ (մեկ շնչի հաշվով- խմբ․) սկզբունքով, իրենց աշխատավարձը բավականին իջել է»,- նշեց Պողոսյանը։
Ըստ նրա՝ ապահովագրության ներդրման պահին Ապահովագրական հիմնադրամում կար 1 աշխատող՝ տնօրենը։
***
«Մենք բարձրաձայնում ենք ապահովագրության հետ կապված խնդիրները, որոնք առաջացել են բժիշկների մոտ՝ և վարձատրության, և հերթագոյացման առումով: Ես իմ օրինակով էլ եմ տեսել, բայց եթե ուշադիր լինեք, սոցցանցերում բժիշկները շատ են գրում, որ ստացել են 50 հազար դրամ, 25 հազար դրամ»,- ԱԺ-ի մոտ ընթացող ակցիայի ժամանակ ասաց սոնոգրաֆիստ Կարին Աղալարյանը: «Բժիշկ գիտեմ, որ ստացել է 19 հազար դրամ»,- հավելեց նա:
***
|
Օրեր առաջ բժիշկ Գևորգ Գրիգորյանը ֆեյսբուքյան իր էջում հայտնել էր. «Փետրվարի 23-ին, ժամը 11:00-ին լինելու ենք Ազգային ժողովի մոտ և նամակներ ենք հանձնելու բոլոր խմբակցություններին, ինչպես նաև ԱԺ նախագահին՝ առողջության համապարփակ պարտադիր ապահովագրության բացերի և ռիսկերի վերաբերյալ խորհրդարանական լսումներ կազմակերպելու դիմումով»: Ակցիայի ժամանակ Գևորգ Գրիգորյանը լրագրողներին ասել է․ «Ուզում ենք, որ ապահովագրական համակարգը գործի, բայց արդյունավետ գործի, չոտնահարվեն բուժաշխատողների շահերը»,- ասաց Գրիգորյանը՝ հավելելով. «Մեր պահանջն է, որպեսզի փոխեն վճարման կարգը, նվազագույն շեմը փոփոխեն, բուժաշխատողի վարձատրման մեխանիզմը վերահաշվարկեն, և թող աշխատի ապահովագրական համակարգը, դա իրոք հարց է լուծելու մեր երկրի բնակիչների համար, ուղղակի էդ հարցը պետք է լուծվի պետության կողմից, ոչ թե բուժաշխատողների հաշվին»: |
