«Երեկ հայտարարվեց, որ Այգեպարի բնակիչներին, որոնց տներն օգոստոսի 10-ի ռմբակոծության արդյունքում ոչնչացել են, նոր տներ են հատկացվել: Ընդ որում՝ այդ մասին հպարտորեն հայտարարում էր Տավուշի մարզպետարանը, սակայն ավելի ուշ տեղեկացանք, որ Հայաստան համահայկական հիմնադրամն է որոշել բնակարաններ հատկացնել: Հիմնադրամի հասարակայնության հետ կապերի բաժնից տեղեկացրին, որ բնակարաններն ընտրելու են այրված տների բնակիչները՝ տեղական իշխանությունների հետ համատեղ: Երբ կապվեցինք Արշալույս Գևորգյանի հետ (ում տունն այրվել էր)՝ վերջինիս բնակարան ստանալու կապակցությամբ շնորհավորելու, ինչու չէ՝ նաև աչքալուսանք ուզելու, 78-ամյա Արշալույս պապը զարմացավ՝ բալա ջան, տենց բան դեռ չկա, ինձ ոչ ոք բանալի, փաստաթուղթ չի տվել: «Պադեզդը ո՞րն ա, ոչ ցույց են տվել, մենակ ասեկոսեներ կան, որ երեք սենյականոց տուն են տալիս: Բանալին ձեռքս տան, նոր կհավատամ, որ ինձ բնակարան են տալիս»: Նրա խոսքով՝ ինքը բոլորից ուրախն ու երջանիկը կլինի, որ իրեն բնակարան տան մշտական բնակության համար: «Տան շեմին նստած՝ մտածում եմ, թե էսօր ում տանը գիշերեմ»: Տավուշի մարզպետարանից տեղեկացանք, որ այժմ զբաղված են բնակարանների փաստաթղթերի ձևակերպման գործով»,–գրում է թերթը։
Ուշագրավ այլ հոդվածներ` «Հրապարակ» թերթի այսօրվա համարում
