«Վերջին հարցումներից հետո, մարդկանց կարծիքի ուսումնասիրությունից հետո, իշխանության վախն ավելացել է. ամեն ինչ անելու են, որ Սամվել Կարապետյանը մնա տնային կալանքի տակ, չշփվի ժողովրդի հետ»,- դատարանի մոտ, լրագրողների հետ զրույցում, ասաց «Ուժեղ Հայաստան» կուսակցության խորհրդի նախագահ Նարեկ Կարապետյանը՝ անդրադառնալով այսօրվա նիստից ակնկալիքներն:

Հիշեցնենք՝ ընթանում է գործարարի կալանքի հարցով դատական նիստը:

«Հունիսի 8-ին սկիզբ է դրվելու ուժեղ առաջնորդով, վարչապետ Սամվել Կարապետյանով ուժեղ Հայաստանին: Այդ օրվանից սկսած՝ ամեն ինչ լինելու է իր տեղին: ՀՀ-ում լինելու է անկախ դատարան, իրավական համակարգ, որը կորոշի՝ ով, ինչպես կպատժվի»,- Հակակոռուպցիոն դատարանի մոտ, լրագրողների հետ զրույցում, համոզմունք հայտնեց «Ուժեղ Հայաստան» կուսակցության անդամ Ալիկ Ալեքսանյանը՝ անդրադառնալով հունիսի 7-ին սպասվող խորհրդարանական ընտրություններին:

Նախօրեին հայտնի դարձավ, որ հասարակական, քաղաքական գործիչ Էդգար Ղազարյանը միացել է «Ուժեղ Հայաստան» կուսակցությանը: Որոշումն ինչպե՞ս տրվեց ձեզ, ի՞նչ հանգամանքներ հաշվի առնելով միացաք կուսակցությանը հարցին՝ ասաց. «Ես 2020-ից մասնակից եմ ընդդիմադիր բոլոր շարժումներին, ամենօրյա հասարակական ակտիվ գործունեություն եմ ծավալում, ամեն ինչ շատ բնական ճանապարհով....»: Դիտարկմանը՝ դուք Սերժ Սարգսյանի հետ կապ ունեցող անձ եք ու այդ հանգամանքով պայմանավորված քննադատվեց այս փոփոխությունը, ասաց՝ անմիտ քննադատություն է:

«Զանգովի արդարադատությունը, բնականաբար, պետք է գործեր: Քանի գնում՝ մեր դատական ատյանների հետ կապված հույսս մարում է»,- լրագրողների հետ ճեպազրույցում ասել է ՀԷՑ ՓԲԸ նախկին տնօրեն, «Ուժեղ Հայաստան» կուսակցության խորհրդի անդամ Դավիթ Ղազինյանը՝ անդրադառնալով ՍԴ-ի որոշմանը: «Հետաքրքիր է՝ ինչու են իրավաբանները, դատավորներն այդքան կարճ մտածում»,- հավելել է նա:

Հիշեցնենք, որ Սահմանադրական դատարանը երեկ հայտարարություն էր տարածել ու նշել․ «10.03.2026թ. Սահմանադրական դատարանն ավարտեց «ԱԶԳԱՅԻՆ ԺՈՂՈՎԻ ՊԱՏԳԱՄԱՎՈՐՆԵՐԻ ԸՆԴՀԱՆՈՒՐ ԹՎԻ ԱՌՆՎԱԶՆ ՄԵԿ ՀԻՆԳԵՐՈՐԴԻ ԴԻՄՈՒՄԻ ՀԻՄԱՆ ՎՐԱ՝ «ԷՆԵՐԳԵՏԻԿԱՅԻ ՄԱՍԻՆ» ՕՐԵՆՔԻ 17-ՐԴ ՀՈԴՎԱԾԻ «Գ» ԿԵՏԻ, 27-ՐԴ ՀՈԴՎԱԾԻ 2.1-ԻՆ ՄԱՍԻ, 52.1-ԻՆ ՀՈԴՎԱԾԻ 1-3-ՐԴ ՄԱՍԵՐԻ ԵՎ «ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՄԱՐՄՆԻ ՄԱՍԻՆ» ՕՐԵՆՔԻ 36-ՐԴ ՀՈԴՎԱԾԻ 9-ՐԴ ՄԱՍԻ՝ ՍԱՀՄԱՆԱԴՐՈՒԹՅԱՆԸ ՀԱՄԱՊԱՏԱՍԽԱՆՈՒԹՅԱՆ ՀԱՐՑԸ ՈՐՈՇԵԼՈՒ ՎԵՐԱԲԵՐՅԱԼ» գործով քննությունը, և Դատարանը հեռացավ խորհրդակցությունների սենյակ՝ որոշում կայացնելու համար: Այսօր հրապարակվեց Սահմանադրական դատարանի որոշումը, որի եզրափակիչ մասում նշվում է.

Սահմանադրական դատարանը Ո Ր Ո Շ Ե Ց .

1. «Էներգետիկայի մասին» օրենքի 17-րդ հոդվածի «գ» կետը համապատասխանում է Սահմանադրությանը:
2. «Էներգետիկայի մասին» օրենքի 27-րդ հոդվածի 2.1-ին մասը համապատասխանում է Սահմանադրությանը:
3. «Էներգետիկայի մասին» օրենքի 52.1-ին հոդվածի 1-ին, 2 և 3-րդ մասերը համապատասխանում են Սահմանադրությանը։
4․ «Հանրային ծառայությունները կարգավորող մարմնի մասին» օրենքի 36-րդ հոդվածի 9-րդ մասը համապատասխանում է Սահմանադրությանը:
5. Սահմանադրության 170-րդ հոդվածի 2-րդ մասի համաձայն՝ սույն որոշումը վերջնական է և ուժի մեջ է մտնում հրապարակման պահից։

Մյուս մասերով գործի վարույթը կարճվել է:
Սահմանադրական դատարանի որոշումն ամբողջությամբ կհրապարակվի օրենքով սահմանված կարգով՝ եռօրյա ժամկետում»: