|
«Ժամկետներ չեն նշվել դատարանի կողմից: Ըստ էության, որոշումն ընթերցելիս՝ դատարանի նախագահը շեշտեց, որ այն ունի պարտադիր բնույթ՝ ընդունման պահից: Այսինքն՝ ժամկետ չնշելը նշանակում է, որ անմիջապես գործում է»,- Հաագայի դատարանի որոշմանն անդրադառնալով՝ այսօրվա ասուլիսի ժամանակ հայտարարել է Միջազգային իրավական հարցերով ՀՀ ներկայացուցիչ Եղիշե Կիրակոսյանը: Լրագրողների դիտարկմանը՝ չնայած դատարանի որոշմանը, Լաչինի միջանցքը շարունակում է փակ մնալ, Կիրակոսյանը նշել է. «Ցավոք, միջազգային իրավունքում, միջազգային հարաբերություններում չունենք ինստիտուտ, որը զբաղվի միջազգային դատարանի որոշումների հարկադրաբար կատարման ուղղությամբ: Ամբողջ պրոցեսը քաղաքական է, որը ենթադրում է աշխատանք»: Նրա խոսքով՝ ողջունելի է, որ շատ երկրների ԱԳՆ-ներ սկսեցին հայտարարություններ տարածել՝ հղում կատարելով դատարանի որոշմանը. «Առավելագույնս պետք է ուժեղացնել ճնշումը. միակ ճանապարհը դա է»,- ընդգծել է բանախոսը: |
