«Իրատես de facto» թերթը զրուցել է ՀՀ էկոնոմիկայի նախարար Վահրամ Ավանեսյանի հետ։ Հատված հարցազրույցից.

«Պարոն Ավանեսյան, դասական ձեւակերպմամբ` Դուք «նախկի՞ն» եք, թե՞ «ներկա»։ Որովհետեւ «նստել եք եւ՛ Նիկոլայի օրոք, եւ՛ Նէպ-ի ու Ալեքսանդրի», ո՞ւմ օրոք էիք Ձեզ ավելի լավ զգում:

Ես ինձ դպրոցում էի լավ զգում, հետո ինստիտուտում, եւ եթե ինձ հարցնեին` որտե՞ղ եմ ինձ լավ զգում, ես շատ կդժվարանայի պատասխանել: Չնայած, եթե անկեղծ` հայաթում էի ինձ լավ զգում:

Ոնց տեսնում եմ` այլընտրանքն իսկապես Ձեր կյանքի անբաժան ուղեկիցն է։ Ի՞նչ էիք անում «հայաթում», որպես հայաթավոր:

Ֆուտբոլ էինք խաղում, որ եղանակը ցուրտ էր լինում` հոկեյ:

Ինչպիսի՜ այլընտրանքություն. բա որտեղի՞ց ձեզ սառույց:

Դույլերով ջուր էինք լցնում, սառչում էր:

Ինչպիսի՜ նախաձեռնողական բարեփոխչություն. համարյա այդպես էլ հիմա եք վարվում տնտեսությունում. բա «կանկա՞» որտեղից:

Ի գիտություն Ձեզ՝ ասեմ, որ մեր ընտանիքը բավականին ապահովված էր այն ժամանակ, եւ կարողանում էինք ձեռք բերել:

Ինչպես եւ հիմա եք բարեկեցիկ:

Այո, ինչպես հիմա:

Բախտավորն եք: Հավատո՞ւմ եք միստիկային, կարմային, Ձեր բարեկեցիկ ճակատագրին:

Երբ մարդուն հարցնում են` ինչո՞ւ ես դու բարեկեցիկ, ի՞նչ պետք է պատասխանի նա. սպասեք` մտածեմ։ Ահա` անարժան ձեւով բարեկեցի՞կ եմ։

Կարծում էիք՝ իմ հաջորդ հարցը դա՞ էր լինելու, բարեփոխչորեն առա՞ջ ընկաք:

Ոչ, ոչ, դա անհնար է, ես ի վիճակի չեմ կանխելու Ձեր հարցերը:

Մի հուսահատվեք, Ձեզ եմ հանձնում իմաստության ամենամեծ բանալին. «Երբ տկար եմ, այն ժամանակ ես ուժեղ եմ»։ Գիտեի՞ք:

Չէ՜:

Աստվածաշնչում է գրված, գուցե կարդայիք ու ինձ «կանխեի՞ք»:

Կա, էդ մի խնդիրը ունեմ, չեմ կարդում, հա: Ճիշտ է, լիքը ուրիշ բաներ եմ կարդում, բայց դա կա, համաձայն եմ` Աստվածաշունչը շատ իմաստուն գիրք է:

Ունայնություն ունայնությանց։ Շատ մի տխրեք:

Ի՞նչ եք առաջարկում, տկա՞ր լինեմ:

Այո, տկար եղեք` Աստծուն տեղ թողնելու համար, իրենով լցվելու համար:

Հոգեպե՞ս տկար լինեմ:

Այո, ասում է` երանի աղքատներին, նրանցն է երկնքի արքայությունը:

Նու, գիտե՞ք, ես կարծում եմ` էդտեղ էդպես միանշանակ չէ:

Աղքատությա՞ն, թե՞ ունայնության մասով: Կարող է՝ դրա համա՞ր է կառավարությունն այսպես մոտենում «աղքատության» խնդրին։

Օ՜ֆ… Դժվար է, ինչպես տեսնում եք` ես բավականին թույլ եմ այդ հարցերում, «քալ» եմ իրականում»:

Շարունակությունը և ուշագրավ այլ հոդվածներ` «Իրատես de facto» թերթի այսօրվա համարում