Արթուր Սարգսյանն ու Արթուր Մարգարյանը, որոնք նախկինում ներգրավված են եղել Քենիայում ծագած սկանդալի մեջ, այժմ էլ գործարքներ են անում Մալդիվներում եւ անգամ կապեր ունեն տեղացի քաղաքական գործիչների հետ:
Նյուզ.am-ն է գրում ու նշում, որ ինչպես հայտնի է դարձել տեղական haveeru.com կայքին, անցած տարվա հոկտեմբերին, «Արթուր եղբայրները «Artur Brothers World Connections» անվանումով ընկերություն են հիմնել: Ընկերության գործունեությունը բազմազան է` զվարճանքներ, անշարժ գույք, անվտանգություն, կազինո, աբվտոմեքենաների վաճառք, հյուրանոցների բիզնես եւ այլն: Կայքի տվյալներով` «եղբայրները» Մալդիվներում ներդրումներով զբաղվում են հոկտեմբերից:
Եղբայրներին լուսանկարել են ավտոարշավի ժամանակ զբոսաշրջության նախարար Ահմեդ Ադեեբի եւ պաշտպանության նախարար Մոհամեդ Նազիմի հետ:
Ներգաղթի վարչության աղբյուրները հաստատել են, որ Արթուրները բնակվում են մայրաքաղաքից ոչ հեռու: Հրապարակման հայտնվելուց հետո պաշտպանության նախարար Մոհամեդ նազիմը հերքել է, թե ծանոթ է նրանց հետ:
Նախկինում «Արթուր եղբայրները» մեղսակից են եղել Քենիայում ծագած թմրասկանդալին: Սակայն տարօրինակ ձեւով նրանց հաջողվել է հեռանալ երկրից: Որոշ տվյալներով, նրանք լուրջ կապեր ունեին Քենիայի կառավարության ազդեցիկ պաշտոնյաների հետ:
