«Հրապարակ»-ը գրում է․ «Իշխանության գերնպատակը ՀԷՑ-ի ՔՊ-ականացումն է․ ժամանակավոր կառավարիչ նշանակված Ռոմանոս Պետրոսյանի վերջին օրերի նշանակումներն ասվածի վառ ապացույցն են։ Ռազմավարական նշանակության այս օբյեկտում բարձր պաշտոնների են նշանակվում ոչ թե ոլորտի գիտակներ, այլ՝ կուսակցականներ և Փաշինյանի «լյուբիմչիկներ»։

Դիցուք, ՀԷՑ-ի իրացման տնօրենի նոր տեղակալ, Երևան քաղաքի էներգաիրացման սպասարկման տնօրեն է նշանակվել Արման Սմբատյանը, որը ՔՊ կուսակցության անդամ է, վարչության անդամի թեկնածություն է առաջադրել առաջիկա ընտրություններում, ավագանու նախկին ընտրություններին եղել է իշխանական ցուցակում։

Սակայն նրա ամենամեծ արժանիքը թերևս Փաշինյանի հետ հեծանվավազքին մասնակցությունն է։

Նա մշտապես ուղեկցել է Փաշինյանին հեծանիվ վարելիս և ընդգրկվել նրա սիրելիների ցանկում»։

***

«Ժողովուրդ» օրաթերթը գրում է. «Մեր տեղեկություններով` ՀԷՑ-ի կառավարիչ «գործուղված» Ռոմանոս Պետրոսյանը բավականին մեծ չափի աշխատավարձ է ստանալու. խոսքը մոտ 10 միլիոն դրամի մասին է, որը նա պետք է ստանա յուրաքանչյուր ամիս։
«Ժողովուրդ» օրաթերթը դիմեց ՀԷՑ-ը «գրաված» Ռոմանոս Պետրոսյանին` պարզելու համար, թե որքանով է իրական տեղեկությունը: «Աշխատավարձիս դրույքաչափը շատ ավելի քիչ է, քան ձեր նշած թիվը։ Ես նաև հրաժարվելու եմ ընկերության միջոցներից պարգևավճարներ ստանալու հնարավորությունից, ինչը վաղուց ընդունված նորմ է եղել բարձր ղեկավարության համար։
Ինձ հետ պարգևավճարներ չեն ստանա նաև մյուս բարձրաստիճան ղեկավարները, որոնք նշանակվել են իմ կողմից, կամ կշարունակեն գործել իմ ղեկավարությամբ», – մեզ փոխանցեց Պետրոսյանը:
Հիշեցնենք, որ դեռևս հուլիսի 9-ին «Ժողովուրդ» օրաթերթը տեղեկացրել էր, թե ինչ ունեցվածք է հայտարարագրել Ռոմանոս Պետրոսյանը:

Մինչև 2018 թվականը նա ունեցել է 2001 թվականին ձեռք բերված բնակարան եւ 2014 թվականին ձեռք բերված հողամաս, որոնք գտնվում են Կոտայքի մարզում։ 2019 թվականին` հեղափոխությունից մեկ տարի անց, Երեւանի Արաբկիր վարչական շրջանում նա գնել է բնակարան 51 մլն 357 հազար դրամով՝ 133 հազար ԱՄՆ դոլարով: Իսկ արդեն 2023 թվականին Պետրոսյանը գնել է BMW մակնիշի մեքենա 8 մլն դրամ արժողությամբ. մեքենան 2017 թվականի արտադրության է։ ՊՎԾ նախկին պետի բանկային հաշիվների մնացորդները կազմել են 7 հազար եվրո եւ 7 մլն 420 հազար դրամ։

Ի դեպ, Պետրոսյանը ՊՎԾ պետ դառնալուց հետո 133 հազար դոլարանոց տուն է գնել»։