Առողջապահական հիմնարկներում հաշվառված շաքարային դիաբետով հիվանդներին պետության կողմից անվճար հատկացվում է դեղորայք: Դիաբետիկներին տրվում են «Դիամար», «Դիամեթ», «Դիազոն» տեսակի դեղեր: Սահմանամերձ Տավուշի մարզում բնակվող շաքարային դիաբետով մի քանի հիվանդ «Ժողովուրդ»-ին բողոքեցին, որ այդ դեղերն անարդյունավետ են, դրանք ամենեւին չեն նվազեցնում հիվանդների արյան մեջ շաքարի պարունակության տոկոսը: «Ոնց որ կավիճ լինի, խմում եմ դեղը, սակայն ոչ մի օգուտ»,-գանգատվեց շաքարախտով հիվանդներից մեկը: Հիվանդները զարմանում են՝ միթե ՀՀ առողջապահության նախարարությունն անտեղյակ է, որ այդ դեղերից հիվանդներին քիչ օգուտ կա: Եթե առողջապահության նախարարությունը տեղյակ է այդ մասին, ինչո՞ւ այդ դեղամիջոցները չի փոխարինում ավելի ներգործուն, արդյունավետ դեղերով: Տավուշի մարզում բնակվող շաքարային դիաբետով հիվանդներից շատերը ստիպված են դեղատներում գնել արդյունավետ դեղեր: Դիաբետով հիվանդների համար շատ դժվար է ապրել սահմանամերձ Տավուշում, քանզի սոցիալական խնդիրներին ավելանում են սահմանային գնդակոծությունների վտանգն ու ազերիների ոտնձգություններից զոհվածների կորստյան ցավը:
Շարունակությունը և ուշագրավ այլ նյութեր «Ժողովուրդ» թերթում
