Պատմաբան Արեգ Սավգուլյանը ֆեյսբուքյան իր էջում գրում է․ «Իշխանությունները շարունակում են խաղաղության դափնեպսակներ ստանալ Աբու-դաբիներում աzերի եղբայրների հետ, Իլհամին շնորհակալություն հայտնել, խաղաղության կանոնադրություններ ստորագրել, բայց իրական պատկերն այն է, որ Արցախի նախկին նախագահ Արայիկ Հարությունյանին «ադրբեջանական արդարադատությունը» դատապարտեց ցմահ ազատազրկման։
Հ.Գ. Անկախ իմ կամ մնացածի անձնական վերաբերմունքից, ինձ համար ամոթ է, որ հայը դատապարտվում է թուրքի կողմից, ՄԻՊ-ի Մադմուազել Մանասյանի ականջը կանչի, «թուրք» եզրն այստեղ որպես վիրավորանք չեմ գործածում, այլ իրերն անվանում եմ իրենց անուններով»։

***

ԱԺ-ի դիմաց բողոքի ակցիայի ժամանակ, ԱԺ «Հայաստան» խմբակցության պատգամավոր Գառնիկ Դանիելյանն, անդրադառնալով Բաքվում պահվող ռազմագերիներին, նշել է․ «Չի կարելի մրցանակ շնորհել մի բռնապետի, որը տևական ժամանակ գերության մեջ է պահում մեր հայրենակիցներին՝ խոշտանգելով, իրենց իրավունքները խախատելով և պատանդի կարգավիճակով պահելով բանտում»։

***

Պատմաբան Վահե Սարգսյանի ֆեյսբուքյան գրառումը․ «Ամենասարսափելին այն չէ, որ վատագույն երազում անգամ չէինք պատկերացնի նման ստորացուցիչ տեսարան և օրվա լրահոս՝ Արցախի ռազմաքաղաքական ղեկավարությունը Բաքվում դատապարտվեց ցմահ ազատազրկման։
Սարսափելին այն էլ չէ, որ այս ողբերգությունը ուղիղ կերպով մաս է կազմում «խաղաղության» օրակարգին ու իրագործվում է Արցախի դահճի ու նրա հայաստանյան գործիքակազմի փոխհամաձայնությամբ։
Սարսափելին այն է, որ «խաղաղության» այս գործընթացը ծայրից ծայր բաղկացած է հար և նման ողբերգություններից՝
- «Զանգեզուրի միջանցք» ու ՀՀ-ի ուկրաինացում,
- ՀՀ Սահմանադրության և Անկախության հռչակագրի (իմա՝ հանրապետության) վերացում և Ալիևի Սահմանադրության ընդունում,
- «անկլավների» հանձնում, Արարատի, Տավուշի և Լոռու մարզերը Ադրբեջանի Յաշմա ու Կոմանդո հատուկ ջոկատների պլացդարմի վերածում, դեպի Վրաստան և Իրան միջպետական ճանապարհների հանձնում թշնամուն,
- ադրբեջանցիների լայն թափով վերադարձ և ՀՀ-ի ադրբեջանիզացիա՝ ՀՀ ազգաբնակչության գույքի, անվտանգության ու արժանապատվության հաշվին,
- միլիարդավոր դոլարների ռեպարացիաների պահանջ՝ ընդուպ մինչև ՀՀ-ի վասալացում․ հայ ժողովուրդը և Հայաստանի Հանրապետությունը պետք է գոյատևեն ոչ թե Ադրբեջանի կողքին, այլ Ադրբեջանի համար։
Շարքը շարունակելի է։
Հ․գ․ Սա «խաղաղության» գործընթացի՝ անզեն աչքով տեսանելի ողբերգությունների շարքն է։ Դրանք որոշ մասով արդեն իսկ սկսվել են իրագործվել, իսկ որոշների կիրարկումը լայն թափով սկսվելու է ընդամենը 3-4 ամիս հետո՝ ցեղասպան Թուրքիայի հատուկ ծառայությունների և հետախուզության առանցքային դեմքերից՝ Հաքան Ֆիդանի անմիջական աջակցությամբ խամաճիկների վերարտադրությունից անմիջապես հետո»։

***

Բաքվի դատարանում  շարունակել են հրապարակել հայ գերիների նկատմամբ շինծու դատավարության շրջանակներում դատավճիռները։

Ադրբեջանական լրատվամիջոցների հաղորդմամբ Էրիկ Ղազարյանը, Գուրգեն Ստեփանյանը և Վասիլի Բեգլարյանը դատապարտվել են 15 տարվա ազատազրկման, Գարիկ Մարտիրոսյանը՝ 18 տարվա ազատազրկման, Մադաթ Բաբայանը և Մելիքսեթ Փաշայանը 19 տարվա, իսկ Դավիթ Ալլահվերդյանը՝ 16 տարվա ազատազրկման։