Asekose.am-ի և ՄԵԳԱՊՈԼԻ ԱՄՍԱԳՐԻ հարցերին պատասխանում է երգչուհի Նարինե Դովլաթյանը:
- Մանկության տարիներին Ձեզ հետ կատարված ամենազավեշտալի դեպքը:
- Շատ են եղել: Բայց մի բան կա, որի պատճառով հիմա ես այնպիսին եմ, ինչպիսին, որ կամ: Փոքր ժամանակ անչափ շատ էի սիրում դիմահարդարման պարագաներ: Մեկ անգամ հարևանուհուս պայուսակից հանեցի նրա դիմահարդարման պարագաները և դեմքիս քսեցի: Երբ խեղճ կինը տեսավ, քիչ էր մնում ծեծեր ինձ. շրթներկը լրիվ փչացրել էի: Շատ երեխաների նման ես էլ շատ էի սիրում մայրիկիս բարձրակրունկ կոշիկները հագնել. դրանց կտկտոցն էր ինձ դուր գալիս: Երևի այդ ամենի պատճառով է, որ հիմա չեմ սիրում շպարվել և բարձրակրունկ կոշիկներ հագնել:
- Ձեր ամենամեծ ձեռքբերումը կամ ձեռքբերումները:
- Ամենամեծ ձեռքբերումս «ոչ» ասել սովորելն է:
- Դեպք, որը չէիք ցանկանա ջնջվեր չէր Ձեր հիշողությունից:
- Այսպես, թե այնպես մեր հիշողությունից ոչինչ չի ջնջվում: Ես ամեն ինչ հիշում եմ: Եթե հիշողությունիցս հանկարծ ինչ-որ բան ջնջվի, ապա օրագրերիցս հաստատ չի ջնջվի:
- Պատկերացրեք, թե Ձեր ձեռքում կախարդական փայտիկ կա, ի՞նչ կկատարեիք Ձեզ համար :
-Կախարդական փայտիկով այնքան բան կանեի: Ես հրեշտակ չեմ, իհարկե, բայց կցանկանայի աշխարհի բոլոր հիվանդ մարդիկ առողջանային:
- Աշխատասիրություն թե՞ ընդունակություն. այս երկու որակներից ո՞րն եք նախընտրում:
- Երկուսն էլ շատ կարևոր են: Հնարավոր է մարդ անընդունակ լինի և իր աշխատասիրությամբ գերազանցի ընդունակին: Իսկ ծույլ մարդկանց չեմ սիրում: Ըստ իս՝ երբ մարդն ընդունակ է և տաղանդավոր, պետք է ավելի շատ աշխատի իր վրա:
- Ձեր բնավորության գծերից ո՞րը կցանկանայիք նվիրել Ձեր թշնամուն:
- Թշնամիներ չունեմ, ամեն դեպքում՝ ոչ մեկին ինձ թշնամի չեմ համարում: Ազատվել որոշակի գծերից չէի ցանկանա: Ես ես եմ՝ այնպիսին, ինչպիսին, որ կամ՝ թերություններով և առավելություններով:
- Ի՞նչը կարող է ստիպել Նարինե Դովլաթյանին լիաթոք ծիծաղել և ինչը՝ արտասվել:
- Այն, ինչ ինձ ստիպում է ծիծաղել, մի օր կարող է ստիպել արտասվել, կամ՝ ընդհակառակը: Հիմա հաճախ եմ ծիծաղում այն ամենի վրա, ինչի համար տարիներ կամ գուցե ամիսներ առաջ լալիս էի:
- Նա, ով կարողանում է ներողություն խնդրել … :
- Նա, ով կարողանում է ներողություն խնդրել չի վախենում ընդունել իր սխալը:
- Երջանիկ լինելու համար հարկավոր է … :
- Մարդ չի կարող միշտ երջանիկ լինել: Մենք ունենում ենք երջանիկ պահեր, որոնց համար էլ ապրում ենք:
- Պատկերացրեք, թե գնում եք անմարդաբնակ կղզի՝ մեկ տարի ապրելու: Ամենակարևոր չորս իրերը, որ կվերցնեիք Ձեզ հետ:
- Թուղթ և մատիտ, player ` իմ սիրած երգերով և շատ ուրիշ բաներ:
- Գիրք կամ ֆիլմ, որը հեղափոխել է Ձեր մտքերը:
- Չարլի Չապլինի ինքնակենսագրական գիրքը:
- Ձեր մասին երբևէ լսած ասեկոսեներից ո՞րն է Ձեզ ամենից շատ զայրացրել և ո՞րը` զվարճացրել:
- Բոլոր ասեկոսեներն էլ ինձ համար ծիծաղելի են հենց այն պատճառով, որ չեն համապատասխանում իրականությանը: Բայց մարդիկ անդադար խոսում են ու խոսում…
- Ի՞նչ կխնդրեք Ձմեռ պապիկից այս տարի:
- Հայկական նոր և իմաստալից մուլտֆիլմեր փոքրերի համար:
- Դուք հավաքել եք համբույրի մեծ պարկ, ու՞մ կնվիրեք այն:
- Քույրիկներիս երեխաներին:
Սեդա Հերգնյան
