ASEKOSE.am–ի և Megapolis.am-ի հարցերին պատասխանում է երգչուհի ու ԱԺ պատգամավոր Շուշան Պետրոսյանը:
-Մի պահ ենթադրենք, որ մարդիկ ունենում են մի քանի կյանք. Ձեր հաջորդ կյանքում ո՞վ կամ ի՞նչ կցանկանայիք լինել:
-Եթե լիներ նման հնարավորություն, ապա կցանկանայի դելֆին լինել,իսկ եթե մարդ, ապա` ոչ հայ. կցանկանայի հնարավորինս սառնարյուն մեկը լինել, այդպես ավելի հեշտ է:
-Կարո՞ղ եք հիշել` որն է եղել Ձեր մանկության ամենամեծ վախը:
-Մանկությանս ամենամեծ վախը մութն էր:
-Ձեր բնավորության գծերից ո՞րը կցանկանայիք նվիրել Ձեր թշնամուն:
-Փառահեղ հարց է: Ո՞վ է իմ թշնամին: Թո՞ւքը : Զազրախոս ու չար մե՞կը: Ստախոսն ու քծնո՞ղը: Թուրքի դեպքում ոչինչ չէի նվիրի, քանի որ այստեղ ամեն բան համահունչ է (գուցե սուբյեկտիվ է), թուրքը մնում է թուրք, իսկ մնացած թշնամանք արտահայտող վերաբերմունքները միայն խղճահարության են արժանի, թույլ մարդուն են այդ վերաբերմունքները բնորոշ: Իսկ թույլ մարդուն թշնամի չես համարի:
- Ինչպե՞ս եք վերաբերվում այն մտքին, որ մարդիկ իրականում պատրաստ են վաճառել ամեն ինչ, միայն թե առաջարկվող գինը իրենց գոհացնի:
-Ամեն ինչ չէ, որ վաճառվում է ու խնդիրն այստեղ այլ է: Ամեն ինչ վաճառող մարդիկ արժանի չեն հարգանքի ու որևէ վերաբերմունք ակնկալելն այստեղ անիմաստ է:
-Դեպք, որը չէիք ցանկանա ջնջվեր չէր Ձեր հիշողությունից:
-Շատ են նման դեպքերը, գեղեցիկ օրերը շատ են. երեխաներիս ծննդյան օրերը, Շուշիի ազատագրման օրը, մենահամերգներս…
-Մարդիկ, որոնց բացակայությունը Ձեր կյանքում չեք պատկերացնում:
-Զավակներս, սիրելիներս, ծնողներս:
-Ձեր մասին երբևէ լսած ասեկոսեներից ո՞րն է Ձեզ ամենից շատ զայրացրել և ո՞րը` զվարճացրել:
-Ասեմ, որ բոլոր հորինված թե´ պոզիտիվ, թե´ նեգատիվ ասեկոսեները իրար չեն զիջում իրենց առատությամբ: Հետևաբար, իմ կողմից մատնված են անտարբերության:
-Աշխատասիրություն թե՞ ընդունակություն. այս երկու որակներից ո՞րն եք նախընտրում:
-Ընդունակություն, որը համեմված է աշխատասիրությամբ:
-Կա՞ այնպիսի մի հայտնի ասացվածք, կամ թևավոր խոսք, որը Դուք ընտրել եք որպես կյանքի ուղեցույց:
-Խելացի թևավոր մտքերը շատ են… Միտքն անշուշտ ունի իր խորհուրդը, բայց այն առավել արժևորվում է, երբ գործ է դառնում:
-Էյնշտեյն. «Ապրելու երկու ձև կա: Դուք կարող եք ապրել այնպես, կարծես հրաշքներ չեն լինում, և կարող եք ապրել այնպսե, ասես այս աշխարհում ամեն ինչ հրաշք է: Ինչպե՞ս է նախընտրում ապրել Շուշան Պետրոսյան:
-Ես հրաշքների հավատացողների բանակից եմ:
-Ի՞նչ չունեք, որ կուզեիք ունենալ:
-Սեփական տուն, այգի:
- Գիրք կամ ֆիլմ, որը հեղափոխել է Ձեր մտքերը:
-Գրքերից Ռիչարդ Բախի «Ջոնաթան Լիվինգստոն անունով ճայը», ֆիլմերից «Քաջարի սիրտը»:
- Երգարվեստից քաղաքականություն անցումը ինչե՞ս ընթացավ. եղա՞ն սթրեսներ:
-Անշուշտ եղան ու թեև ասում են, թե պետք է հետզհետե սովորեմ ու ուշադրություն չդարձնեմ այդ անցմանը զուգորդող գործընթացներին, բայց երբեք անտարբեր չեմ լինի ինձ համար անհասկանալի չարության ու տգիտութման հանդեպ. այն ինձ օտար է ու անհասկանալի, միշտ պետք է զարմացնի ինձ:
-Երգարվեստ ու քաղաքականություն. երկու ոլորտների միջև կա՞ն արդյոք նմանություններ, եթե` այո, ապա` որո՞նք են:
-Երգարվեստում կատարումդ հուզում է և արժանանում ես գնահատականի: Քաղաքականության մեջ խոսքդ կշիռ ունի, երբ իրականացնում ես այն ու նույնպես գնահատականի արժանանում: Թերևս միակ նմանությունները:
