Վարչապետի պաշտոնակատար Նիկոլ Փաշինյանի խոսքով՝ ոչ ԱՄՆ նախագահի Ազգային անվտանգության հարցերով խորհրդական Ջոն Բոլթոնը, ոչ էլ որևէ մեկը չեն կարող խոսել իր անունից։ Այս մասին Փաշինյանը հայտարարել է այսօր լրագրողների հետ զրույցում՝ պատասխանելով հարցին, թե ինչպես է վերաբերվում Բոլթոնի այն գնահատականին, թե վարչապետ ընտրվելուց հետո Փաշինյանը կարող է վճռական որոշումներ կայացնել նաև ԼՂ հարցով։
«Ամեն մեկը կարող է խոսել իր անունից։ Ջոն Բոլթոնը խոսում է իր անունից, և Ջոն Բոլթոնը, և ընդհանրապես որևէ մեկը չի կարող խոսել իմ անունից», - ասաց Նիկոլ Փաշինյանը։
Ինչ վերաբերում է Վիեննայի և Սանկտ Պետերբուրգի պայմանավորվածություններին, Փաշինյանն ասաց, որ դրանք չեն մոռացվել, ցանկացած հանդիպման ժամանակ դրանց մասին խոսում է, բայց ի տարբերություն նախորդ իշխանությունների, Հայաստանի այս իշխանություններին հաջողվել է կոնկրետ քայլեր անել ու կոնկրետ պայմանավորվածություններ ձեռք բերել, այդ թվում նաև զինադադարի վիճակի շատ, թե քիչ պահպանման հարցում. «Ցույց տվեք մի դեպք, որ Հայաստանի ցանկացած ղեկավար հանդիպել է Ադրբեջանի որևէ ղեկավարի, հետո նստել ուղիղ եթեր ու պատմել, թե ինչ են պայմանավորվել:
Ինչու Հայաստանի ղեկավարները չեն եկել ամեն հանդիպումից հետո ուղիղ եթեր մտել ու ասել, թե ինչի մասին են խոսել: Ես ասել եմ, թե ինչ պայմանավորվածություններ ենք ձեռք բերել: Էլ ի՞նչ պետք է անեի, որ չասեն ստվերային պայմանավորվածություն է եղել: Բայց ես ասել եմ, որ չի կարող լինել որևէ լուծում, որը ընդունելի չի լինի Հայաստանի և Արցախի ժողովուրդների և Արցախի իշխանությունների համար», - ասել է Նիկոլ Փաշինյանը։
