Չստացված մանկության մեջ թվացյալ անկատար երազանք, որն արդեն իրականություն է: Նունե Աշուղյանի մանկության ու պատանեկության տխուր օրերի էջն արդեն թերթված է: Նունեին անծանոթ էին մանկության անհոգ օրերը, իսկ պատանեկության տարիների լույսը վառվեց Օրրանի հետ ճակատագրական հանդիպումով:
Օրրանն օգնեց Նունեին` թեկուզ և պատանեկության տարիներին հետ բերել կորցրած մանկությունն ու ապրել կյանքի ամենալուսավոր օրերի բաց թողնված բերկրանքը: 2000 թվականից հիմնադրված Օրրան բարեգործական կազմակերպությունը ձեռք է մեկնել բազում երեխաների ու ծերերի, ովքեր կարիք են ունեցել ոչ միայն սոցիալական օգնության, այլ նաև` ընտանեկան ջերմության, հոգատարության, հարազատ ու անկեղծ ժպիտի:
Օրրանի առավելությունը նրանում է, որ այն, լինելով մեծ ընտանիք, իր դուռը թակողին չի կտրում սեփական ընտանիքից, այլ շտկում է կարիքավոր ընտանիքների կորացած մեջքն ու ամրացնում դրանց սյուները` Հայաստանի վաղվա սերունդը: Օրրանը չի սպասում, որ իրեն դիմեն, ինքն է իր օգնությունն առաջարկում:
Իսկ ի՞նչ տվեց Օրրանը Նունեին. Նունեի խոսքով՝ Օրրանի միջոցով ինքը կարողացել է ազատվել բարդույթներից ու իրեն հասարակության լիիրավ անդամ զգալ: Օրրանը նրան դաստիարակել է, օգնել է կրթվել, զարգանալ ու ամենակարևորը Օրրանն իրականությունը է դարձրել նրա ամենանվիրական երազանքը...
Երգչուհի դառնալու երազանքը կատարված է, բայց Նունեի սրտի ամենախորքում մանկությունից մնացած մի նվիրական ցանկություն էլ կա, սակայն դեռևս անկատար: Կրկին պատահական ծանոթության արդյունքում այսօր Նունեն ունի հրաշալի ամուսին ու ստեղծել է հրաշալի ընտանիք:
Դստերն ու որդուն` մեկ ու կես տարեկան Թերեզային և չորս ամյա Էրիկին, այսօր Նունեն տալիս է այն ջերմությունն ու ապահովության զգացողությունը, որոնց կարիքն ինքը ժամանակին շատ է ունեցել:
Ավելին, Նունեն իր սկեսուրի հետ ունի իրենց ընտանեկան արտադրամասը, որի ստեղծման գործում դարձյալ մեծ է Օրրանի ներդրումը:
Նունեն գտել է իր երջանկությունը, իսկ երջանկության բանաձևը նրան դարձյալ հուշել է Օրրան բարեգործական կազմակերպությունը: Թեև այսօր նրա կողքին են զավակներն ու սիրող ամուսինը և նա հպարտանում է իր ստեղծած ընտանիքով, բայց, այնուամենայնիվ, երբեմն տխրում է:
Նունե մտածում է իր ընտանիքի մասին ու շարունակում է հավատալ, որ կգա մի օր, երբ իր մոր ու եղբոր կյանքում ևս հրաշք կկատարվի և նրանք էլ կկարողանան թերթել իրենց կյանքի տխուր էջը:
Հեղինակ` Սաթենիկ Խաչատրյան
Օպերատոր` Արմեն Հակոբյան-Թամրազյան
Մոնտաժի ռեժիսոր` Էդուարդ Սողոյան
Asekose.am Փրոդաքշն
Կարդացեք նաև` 100 տարի առաջ չէինք կարող փրկել մեր երեխաներին, այսօր կարող ենք. «Օրրան»-ի կոչը
