shamshyan.com-ը գրում է. «ԱԺ պատգամավոր Մհեր Սեդրակյանի հետ ես մոտ շփում չեմ կարող ունենալ: Բայց շատ սիրում եւ հարգում եմ: Չեմ կարող ասել` ես իր մոտիկն եմ, բայց ինքը մեր համար ամեն ինչ է: Նա մեզ համար ծնողին հավասար մեծություն է»: Այս մասին ֆոտոլրագրող Գագիկ Շամշյանի հետ զրույցում ասել է 29-ամյա Մարտուն Կարապետյանը` «Կյաժ Մարտունը»-ը: Վերջինս զբաղվում է Հունահռոմեական ըմբշամարտով: Լեհաստանում եւ Վրաստանում անցկացվող առաջնություններում զբաղեցրել է 2-րդ տեղը: Ավելին, 2 մրցաշարում էլ մրցել է թուրք մարզիկի հետ եւ պարտության մատնել նրան, որից հետո թաղամասում նրան անվանում են թուրքի «քիլլեր»:

Տեսանյութը` shamshyan.com-ի

Գագիկ Շամշյանի եւ նրա զրույցից հատված նաև ստորեւ:

-Երկու օր է, ինչ էլեկտրոնային լրատվամիջոցներում շրջանառվում է ձեր անունը` Նուբարաշենի հայտնի կրակոցների եւ 3 հոգու սպանության գործով: Ասում են, թե դուք ԱԺ պատգամավոր Մհեր Սեդարակյանի` Թոխմախի Մհերի «քիլլերն» եք: Ավելին, տարել են «ԿԿԲ», մի քանի ժամ պահել են, ծեծել, ձեռքերդ կոտրել են ու դրել չհրկիզվող պահարանի տակ: Բայց նայելով ձեզ եւ ձեր ձեռքերին` համոզվեցի, որ այդ ամենը հեքիաթ է: Դուք ինքներդ այդ ամենը լսելով` ի՞նչ ապրումներ ունեցաք:

-Ես ոչ մի տեղ չեմ եղել: Ինձ ոչ մի տեղ չեն տարել: Իսկ ինչ մնում է, թե ինչ ապրումներ ունեցա, ցավ եմ ապրում սպանվածների համար, որովհետեւ ջահել տղերք էին: Այդքան բան:

-Այսինքն, այդ լուրերից հետո ձեզ «ԿԿԲ» չե՞ն տարել, ինչպես որոշ լրատվամիջոցներ էին գրել:

-Ոչ:

-Բա ինչի՞ համար են ձեր անունը շրջանառում: Ո՞ւմ է դա ձեռնտու:

-Չեմ կարող ասել, բայց ինձ էլ է շատ հետաքրքիր:

-Ասում էին նաեւ, թե ձեր մականունը «Քիլլեր» է: Բայց այսօր, երբ ձեր թաղի երիտասարդների հետ զրուցում էի, ասում էին, որ միայն թուրքի պարագայում կարող է «քիլլերի» հետ ասոցացվել, որովհետեւ ձեր մարզական գործունեության ընթացքում 2 անգամ պարտության եք մատնել թուրք ըմբիշին: Ի՞նչ սպորտաձեւով եք զբաղվում եւ ի՞նչ թուրքի մասին է խոսքը:

- Հունահռոմեական ըմբշամարտով եմ զբաղվում եւ 2 անգամ պարտության եմ մատնել թուրք ըմբիշին: Այդ օրվանից հետո ինձ ասում են «քիլլեր»: Իմ մականվան պատմությունը ասոցացվում է միայն դրա հետ եւ ոչ ավելին:

-Ստացվում է` դուք թուրքին տապալել եք հանուն հայկական դրոշի ծածանմա՞ն: Բայց արդյունքում ստացվում է, որ 3 հոգու սպանության մեղավորությունը ցանկանում են բերել-գցել ձեր գրպանը: Դաժան է:

-Իհարկե: Հատկապես, երբ կեղծ է եւ սուտ:

-Բայց ո՞նց կարող էին ասել, թե Ազգային անվտանգության նկուղում ձեզ ծեծել են: -Հիմա ձեր առջեւ նստած եմ: Ձեր աչքով ինձ տեսնում եք` ծեծե՞լ են: Որ տարած լինեին` կարող է` ծեծեին, բայց չեն տարել: Ինչի՞ համար տանեն, ինչի՞ համար ծեծեն: Ի՞նչ եմ արել որ՝ իմ եւ ազգիս համար սպորտով եմ զբաղվում:

-Մարտուն, իսկ ի՞նչն է պատճառը, որ ձեզ կապում են ԱԺ պատգամավոր Մհեր Սեդրակյանի անվան հետ: Դուք նրա հետ շփում ունեցե՞լ եք:

-Ես նրա հետ մոտ շփում չեմ կարող ունենալ: Բայց շատ սիրում եւ հարգում եմ: Չեմ կարող ասել՝ ես իր մոտիկն եմ, բայց ինքը մեր համար ամեն ինչ է: Նա մեզ համար ծնողին հավասար մեծություն է: Հնարավոր է` մեզ նրա հետ տեսել են, դրա համար են ենթադրում, որ ես իր «ախրանիկն» եմ: Որոշ երեւանցիներ այդպես են կարծում: -Ձեր թաղամասի երիտասարդները ասում էին, որ սպորտում ունեցած ձեր հաջողությունների հարցում Մհեր Սեդրակյանը եւս իր մեծ լուման ունի: Հնարավոր է` դա՞ է նաեւ պատճառը:

-Կարա լինի: Նա շատ է օգնել եւ սատարել, ու ոչ միայն ինձ, այլեւ բոլորին: Ու փառք Աստծո, այսօր այդ բոլոր տղաներն էլ կան եւ կարող են ապացուցել:

Նյութը` սկզբնաղբյուր կայքում