Տևական ժամանակ է, ինչ «Նավավար ձկնալի ըմպելարան»-ը սկսել է իր նավարկությունը, ինչն էլ մայրաքաղաքի բնակիչներին և հյուրերին առօրյա թոհ ու բոհից կտրվելու և ինքնատիպ ժամանց անցկացնելու հնարավորություն է տալիս. մի խոսքով` իսկական նավահանգստային միջավայր լեռներում: «ՆԱՎԱՎԱՐ»-ի հիմնադիրներից` հեռուստահաղորդավար, պրոդյուսեր, ճանապարհորդ, տասնյակ ֆիլմերի հեղինակ Արթուր Բախտամյանը խոստովանում է, որ ինքն իր տեսակով արշավային մարդ է.
«Առաջին գիշերակացն առաջին կուրսում էր, Մեծամորի շամբուտներում, գարնանային սառը անձրևի տակ: Ոչ մի չոր հագուստ չէր մնացել, բայց հեռանալ եղեգնուտից անհնար էր` ամենուր բադեր էին, ձկնկուլներ, մենք ծխացող ձկնապուրի կաթսայի շուրջ: Հետո հաջորդեցին լեռնային արշավները` Արա լեռ, Արագած, Զանգեզուր, Մեծ Կովկաս: Այստեղ գտա և կորցրեցի ընկերներ: Լեռնային ցուրտ գիշերակացները, արևամուտին շառագունող գագաթները, հետևից լսվող, նույն պարանով կապված ընկերոջ հևքը և ճամբարում քեզ սպասող տաք թեյը և ընթրիքը»:
Արկածների սիրահարար Արթուր Բախտամյանը պնդում է, որ արշավային կենսակերպի կարևոր բաղկացուցիչն ընկերներն ու երեկոյան խառույկի մոտ պատրաստվող ընթրիքն է, սակայն դրանց բացակայության պարագայում համապատասխան մթնոլորտ կարելի է գտնել «Նավավար ձկնալի ըմպելարան»-ում.
«Ձուկը և ձուն այս խոհանոցի հիմնական մթերքներն են, հարյուրավոր համեղ կերակրատեսակներ կարելի է պատրաստել և որպես լավ հանգրվան: «Նավավար ձկնալի ըմպելարան»-ն առաջարկում է կեսօրվա ձվածեղի բազմազան տեսականի, իսկ երեկոյան, ընկերներով կհամտեսեք օրվա որսը, ձկնապուրը, աղի տառեխն ու գինիները»:
Նշենք, որ ամեն օր ժամը 12:00-ից կարող եք վայելել «ՆԱՎԱՎԱՐ»-ի ճաշացանկում ներկայացված երկու տասնյակից ավելի ձվածեղները: Այս առիթով էլ «ՆԱՎԱՎԱՐ»-ի «զորահանդեսի» հրամանատար Արթուր Բախտամյանը վերհիշում է իր արշավների ժամանակ համտեսած ամենահամեղ ձվածեղը.
«Ամենատպավորիչը Զանգեզուրում էր: Երկու շաբաթ Մթնաձորում անցկացնելուց հետո, Որոտանի կիճն է վեր, ծանր ու խոնավ ուսապարկերով բարձրանում էինք լեռնային արահետով: Ետևում բռնված առաջին կարմրախայտերն էին, մեծ ջրվեժները, որոնց տակ մերկ լողանում էինք: Բղենո Նորավանքի աղբյուրի մոտ մի կին էր կանգնած, երևի մեր գզգզված տեսքից հասկացավ, որ վաղուց մարդու երես չենք տեսել: Երկար լվացվում էինք ու ջուր խմում, հևիհև պատասխանում նրա հարցերին: Հետո քայլեցինք դեպի Բարձրավան, ճանապարհին ջրի գնացող մի կնոջ հանդիպեցինք, երկու համագյուղացի իրար հետ խոսում էին մեզանից, այն ժամանակ Զանգեզուրի բարբառը շատ հասկանալի չէր: Խոսակցությունը ավարտվեց. «Մի եղածու գցեմ»: Ամենահամեղ եղաձուն էր»:
Հավելենք նաև, որ սեփական պատրաստության ձկնապուխտներից, ավանդական և նոր մշակված քսան ճաշատեսակներից, օրվա որսից, ձկնապուրներից և ձվածեղներից բացի «ՆԱՎԱՎԱՐ»-ում կարող եք վայելել աշխարհի և տեղական լավագույն գինիների մեծ ընտրանին:
Իսկապես «Նավավար ձկնալի ըմպելարան»-ն արկածասերների լավագույն կողմնացույցն է, որը, հիշեցնենք, գտնվում է Երևանի հենց սրտում` Արամի 42/1 հասցեում:
«ՆԱՎԱՎԱՐ»-ի նորություններին կարող եք հետևել ձկնալի ըմպելարանի ֆեյսբուքյան էջում:
Հեղինակ` Լիլիթ Հակոբյան
