Քրիշտիանու Ռոնալդուն, ով Հայաստան-Պորտուգալիա/2:3/ խաղում դարձել էր հեթ-տրիկի հեղինակ, չսպասելով իր թիմակիցներին, ինքնաթիռ է վարձել ու երեկ կեսգիշերին մոտ մեկնել է Հայաստանից:
Օդանավակայանում ֆուտբոլային աստղն ականատես է եղել, թե ինչպես են ոստիկանները վարվում իրեն ճանապարհել եկող հատուկենտ երկրպագուների հետ:
Նրանցից մեկը Asekose.am-ին տեղեկացրեց, որ պորտուգալախոս ընկերների հետ իմացել էին Ռոնալդուի հապճեպ մեկնման մասին ու որոշել էին այցելել օդանավակայանի VIP բաժին` հրաժեշտ տալու իրենց սիրելի ֆուտբոլիստին:
Երբ Քրիշտիանու Ռոնալդուն մտել է սրահ` տղաներից մեկը պորտուգալերենով ողջունել է ու խնդրել լուսանկարահանվել: Ֆուտբոլիստը ժպտացել է ու ցանկացել է մոտենալ երիտասարդներին, սակայն տեղում ծառայություն իրականացնող ոստիկաններին հրահանգներ տվող ոմն ուսադիրավոր մռայլ հայացքով խցկվել է երիտասարդների ու ֆուտբոլիստի արանքում ու արգելել է նկարել:
Մեր զրուցակիցը նշեց, որ իրենք ավելի վիրավորված էին, որ իրենց սիրելի ֆուտբոլիստ Քրիշտիանու Ռոնալդուն Հայաստանում, թեկուզ այն լքելուց րոպեներ առաջ, ականատես է լինում նման տհաճ պահվածքի` մանավանդ, որ երկրպագուների գործողությունները օրինական էին:
Առավել տհաճը, ըստ մեր զրուցակցի, այն է եղել, որ նույն ուսադիրովոր չինովնիկը երկու հոգու, հատուկ «բեյջեր» տալով, մտցրել է օդանավակայանի արդեն արգելված գոտի` լուսանկարահանվելու Քրիշտիանու Ռոնալդոյի հետ:
Ըստ մեր տեղեկությունների` այդ երկուսը եղել են ոստիկանական համակարգում աշխատած մի ռեստորանատերի թոռներ/ օբյեկտը, որի անունը դիտմամբ չենք նշում, գտնվում է Մաշտոցի պողոտայում/:
Դե ինչ` հարկ է նշել, որ Քրիշտիանու Ռոնալդուն Հայաստանում անցկացված օրերի ընթացքում ծանոթացավ պաշտոնյանների որդի լինելու «առավելություններից» մեկին` համաշխարհային աստղի հետ լուսանկարվելու բացառիկ հնարավորությանը:
Չնայած վստահ ենք, որ քաղբանտարկյալ Շանթ Հարությունյանի որդու քայլն ամենահիշվողն է լինելու Ռոնալդուի հայաստանյան տպավորություններում: