Վերջին օրերին  արցախա-ադրբեջանական հակամարտ զորքերի շփման գծում լարվածությունը աճեցնելուն զուգահետ ադրբեջանցիները փորձում են իրենց ոչին բնորոշ  ապատեղեկատվություն տարածել համացանցում: Նրանք հայկական անուն-ազգանուններով ֆեյսբուքյան էջեր են բացում, ապա  նյութեր են տարածում` ամեն անգամ ներկայացնելով իբր հայկական կողմի կրած կորուստների թիվը կամ այդ փաստն «ապացուցող» տեսանյութեր: 

Այսօր նույնպես ադրբեջանցիները տեսանյութ էին տարածել, թե իբր  իրենց զինուժը «շարքից հանել է» հայկական մի հենակետ: Սակայն իրականում տեսանյութը բեմադրություն է և այնքան վատ է մոնտաժված, որ երևում են ինչպես նկարահանման վայրի հետևում գտնվող լուսավոր քաղաքը, այնպես էլ ադրբեջանցի զինվորների անտաղանդ խաղը:

Նշված՝ անհաջող մոնտաժված տեսանյութը կարող եք դիտել ստորև, սակայն մեր կողմից մոնտաժված տարբերակով: 

Հիշեցնենք, որ ավելի ուշ Արցախի ՊՆ խոսնակ Սենոր Հասրաթյանը հերքել էր լուրը` նշելով, որ հակառակորդը իր նախահարձակ գործողությունների արդյունքում կրած ծանր կորուստներից հետո սեփական հանրության շրջանում բավականին բացասական հնչեղություն ստացած հասարակական կարծիքը մեղմելու նպատակով է նման լուրեր տարածում: 

Այս դեպքում ևս, ինչպես բազմիցս հորդորել են Արցախի և ՀՀ ՊՆ քարոզչության պատասխանատուները,  պարզապես պետք է խուճապի չմատնվել և չտարածել չճշտված տեղեկություններ: 

Հիշեցնենք նաև, որ օրեր առաջ համացանցում հայտնվել էր տեսանյութ, որում երևում էր, թե ինչպես են ադրբեջանցիները սովորում հայերեն եև ներթափանցում մեր շարքերը:

Հեղինակ՝ Ա. Գրիգորյան