«Այդ օրն իմ տղան վատառողջ էր, մենք պարզապես գնացել էինք հաց ուտելու, բացի դրանից, այդտեղ բոլորն են գնում հաց ուտելու: Մոտեցան և հարցրին` արդյո՞ք կարելի է Ձեզ նկարել, որպեսզի ցույց տանք, թե Հայաստանում կյանքն ինչ հաճելի է, որ մարդիկ բնության գրկում հաց են ուտում: Նման տեքստերով դիմեցին մեզ: Մենք դեմ չէինք, նկարեցին, իսկ կողքի սեղանի մարդիկ հրաժարվեցին նկարվելուց, շատ վատ արձագանքեցին»,-Asekose.am-ի հետ զրույցում նշեց դերասան Նարբե Պողոսյանը` անդրադառնալով բրիտանական հայտնի պարբերականի` Daily Mail-ի հրապարակմանը, որոնցում դերասանը կնոջ` Աստղիկ Ալավերդյանի և որդու հետ ճաշում էր այն ռեստորանում, որտեղ արջերը գտնվում են վանդակներում` անմխիթար վիճակում:
Նարբեի խոսքով` իրենք չեն իմացել, թե ովքեր են իրենց նկարողները.
«Ես չեմ իմացել, թե նրանք որտեղից են, նրանք չեն ասել, թե որտեղից են: Չեմ ուզում ասել, թե ում մասին է խոսքը, դեռ դրան չեմ անդրադառնա, որովհետև բանակցությունների մեջ ենք, որպեսզի այդ նյութը հանվի հրապարակումից`առավոտվանից ինձ անիմաստ տեղը նմանատիպ պատմության մեջ գցելու համար: Ես ուզում եմ` նա պարզաբանում տա, հետո ես անուններ կտամ, եթե պետք լինի»:
Մեր զրուցակցի խոսքով` այս ամենը նման հնչեղություն չէր ստանա, եթե հայտնի մարդկանց անուններ չշոշափվեին:
«Այսօր առավոտվանից զանգեր եմ ստանում, բայց ես ընդհանրապես տեղյակ չէի այս նյութից: Եթե սովորական մարդու նկար դնեին, միգուցե ոչինչ էլ չլիներ: Հիմարություն են գրել: Ինձ խաբել են, ես ինչ կապ ունեմ այն բանի հետ, թե արջը վանդակում է, թե ` ոչ: Ես գնացել մե ընդամենը հաց ուտելու, նրանք ցանկացել են նկարել մեզ, մենք էլ համաձայնվել ենք: Ինձ ընդհանրապես այդ արջերը չեն հետաքրքրել: Ինձ համար դա խայտառակություն չէ, քանի որ ես ոչինչ չեմ արել»,-Asekose.am-ի հետ զրույցում նշեց դերասան Նարբե Պողոսյանը:
Հեղինակ` Ա Գրիգորյան