Պետական միջոցներից ֆինանսավորվող Հանրային հեռուստատեսությամբ՝ Առաջին ալիքով եթեր հեռարձակվող «Ամենակարող երգիչը» նոր երաժշտական նախագիծի շուրջ հանրային վրդովմունքը լայն թափ է ստանում։
Համացանցի օգտատերերը, այդ թվում հայտնի ու սիրված արվեստագետներ, հերթական անգամ իրենց բողոքի ձայնն են բարձրացնում Հ1-ի մատուցած անճաշակության դեմ:
Օպերային աշխարհահռչակ երգչուհի Հասմիկ Պապյանն, օրինակ, գրել էր. «Ոտքի՛ հայ ժողովուրդ! Սա երկար մտածված, լավ կազմակերպված և մեր մշակույթը վերջնականապես կացնահարելու հանցավոր գործողություն է: Անհրաժեշտ է այն անհապաղ դադարեցնելու միջոցներ ձեռք առնել»:
Սրանից հետո համացանցում ստորագրահավաք էր սկսվել՝ հաղորդումը փակելու պահանջով , իսկ ավելի ուշ հայտնի էր դարձել, որ խնդիրքն արդեն իսկ ուղարկված է Հեռուստատեսության և ռադիոյի ազգային հանձնաժողովին։
Եվ ահա` ոմն Արթուր Մանուկյան, որ , ինչպես հետո պարզվեց, Հանրային հեռուստաընկերության աշխատակից է, պատասխան գրառում է կատարել, իր խոսքով, «բոլոր չուզողների համար»:
«Բոլոր սուտի արվեստագետների համար, ամբիացիաները և ձեր ճաշակը օգտագործեք ձեր ստեղծագործություններում, այ արվեստագեղեր»,-գրել է Արթուր Մանուկյանը, որ, աշխատելով Առաջին Ալիքում, կարծես տարվա մեջ հաճախ է լինում ԱՄՆ-ում ու այս գրառումն էլ է այնտեղից արել:
Թե ինչ է անում Արթուր Մանուկյանը ԱՄՆ-ում, ինձ դեռ չի հետաքրքրում, սակայն հիմա ինձ մի հարց է հուզում՝ Հասմիկ Պապյանին, Վահան Արծրունուն ու Ռուբեն Հախվերդյանին է նա «արվեստագեղցի» անվանում:
Սա արդեն մտածելու լուրջ տեղիք է տալիս ու հերթական անգամ համոզում, որ եթե մեր երկրում ինչ-որ բան այն չէ, դրա հիմնական պատճառը ցավալի փաստն է, որ շատերն իրենց տեղում չեն ու պատահական մարդիկ են, որ ոչ դաստիարակություն ունեն, ոչ էլ մշակույթ:
Իսկ սույն երիտասարդին ու նրա ղեկավարին ստիված ենք հիշեցնել որ Հանրային հեռուստաընկերությունը պարտավոր է հաշվի նստել իր լսարանի պահանջի հետ, քանի որ այն ֆինանսավորվում է պետական բյուջեից:
Այլ կերպ ասած, նրանք օգտագործելով և վատնելով մեր գումարները, մեզ են ներկայացնում իրենց ճաշակին համապատասխան, հաղորդում ու դեռ` մեր սիրելի ու համախոհ արվեստագետներին համարձակվում են «արվեստագեղցի» անվանել:
Հեղինակ՝
Ա.Մաթևոսյան
