Օրեր առաջ տեղեկացրել էինք, որ «Դատապարտյալների հիվանդանոց» քրեակատարողական հիմնարկում մոտ 20 դատապարտյալ ծեծի են ենթարկել մեկ այլ դատապարտյալի` Սահակ Քալյանին: Այս միջադեպի առիթով նշանակվել էր ծառայողական քննություն, որը դեռ չի ավարտվել:
Asekose.am-ին այս ծեծկռտուքի վերաբերյալ որոշ ուշագրավ հանքամանքներ, այնուամենայնիվ, հայտնի են դարձել:
Մեր աղբյուրները, մասնավորապես, փոխանցում են, որ Սահակ Քալյանը հարբած վիճակում ցանկացել է երգեցնել աշտարակցի Կարենին /հանրությանը հայտնի է որպես երգիչ Կարեն Հակոբյան/, սակայն վերջինս հրաժարվել է դա անել և ծեծի է ենթարկվել Սահակի կողմից:
Այդ ամենից վիրավորված Կարենը դիմել է իր ընկերներին, ովքեր, «զոն նայող» Արմանի գլխավորությամբ և այլ դատապարտյալների հետ միասին, դաժան ծեծի են ենթարկել Սահակին` նրան հասցնելով ծանր մարմնական վնասվածքներ:
Այս ամենը տեղի է ունեցել աշխատողների և դատապարտյալների աչքի առաջ:
Մեր աղբյուրները փոխանցում են նաև, որ դեպքի մանրամասներից տեղյակ են «Դատապարտյալների հիվանդանոց» ՔԿՀ պետ Արամ Խաչատրյանը և նույն ՔԿՀ-ի անվտանգության պետ Ռաֆիկ Հովհաննիսյանը:
Asekose.am-ի լրագրողի հետ զրույցում ՀՀ ԱՆ ՔԿՀ հասարակայնության հետ կապերի և լրատվության վարչությունից միայն հաստատեցին, որ Կարեն Հակոբյանը վերջերս տեղափոխվել է դատապարտյալների հիվանդանոց, քանի որ ունի լյարդի, ստամոքսի, նյարդերի ու սրտի հետ կապված խնդիրներ ու հիմա հետազոտությունների և բուժման փուլում է գտնվում:
Իսկ այն հարցին, թե նա որևէ կապ ունի այս ծեծկռտուքի հետ, կրկին հիշեցրին ծառայողական քննության ընթացքի մասին ու խորհուրդ տվեցին սպասել այդ քննության ավարտին:
