Ինչպես արդեն տեղեկացրել ենք, համաձայն շրջանառվող տեղեկությունների՝ այսօր Վերնիսաժի մոտ հնչած կրակոցների կազմակերպողներից է եղել ԲՀԿ-ական պատգամավոր Կարո Կարապետյանի՝ «Յուվեցի Կարոյի» տղան:
operativ.am-ն էլ գրում է, որ կայքի ունեցած տեղեկություններով` հնչած կրակոցների մասնակից է եղել նաև նախագահի աշխատակազմի աշխատակից Գառնիկը, ով հանդիսանում է Ուկրաինայում ՀՀ դեսպան Անդրանիկ Մանուկյանի փեսան:
Դեպքի վայրում հայտնաբերվել է Գառնիկի և նրա եղբոր ավտոմեքենաները` Porsche Cayenne մակնիշի 80 ՊՊ 008 համարանիշի և Toyota մակնիշի 80 TT 008 համարանիշի ավտոմեքենաները:
Հիշեցնենք, որ Վերնիսաժում տեղի ունեցած կրակոցներից հիմնականում տուժել են տարածքում աշխատող քաղաքացիներ. 5 անձ հրազենային վնասվածքներով տեղափոխվել է հիվանդանոց:
Փաստի առթիվ հարուցվել է քրեական գործ ՀՀ քրեական օրենսգրքի 235 հոդվածի 1-ին մասի և 258 հոդվածի 4-րդ մասի հատկանիշներով:
Նշանակվել են մի շարք փորձաքննություններ: Ձեռնարկվում են օպերատիվ-հետախուզական և քննչական անհետաձգելի միջոցառումներ հանցագործություն կատարած անձին (անձանց) հայտնաբերելու ուղղությամբ:Նախաքննությունը շարունակվում է:
Ավելացնենք, որ ավելի ուշ Ուկրաինայում Հայաստանի դեսպան Անդրանիկ Մանուկյանը հերքել է շրջանառվող լուրերը, թե այսօր Վերնիսաժի մոտ տեղի ունեցած կրակոցների մասնակիցներից մեկը նրա փեսան էր՝ նախագահի աշխատակազմի աշխատակից Գառնիկ Առաքելյանը:
