2004 թվականին Էջմիածին քաղաքում հիմնադրված «Վաղարշապատ» երգի պարի թատրոնը շարունակում է հիմնադրման օրվանից իր առջև դրված կարևոր առաքելության իրագործումը, այն է՝ հայ մշակույթի պահպանում և ներկայացում, սփյուռքի հետ ակտիվ համագործակցություն:
Ի սկզբանե բարեգործական և ամբողջովին անվճար հիմքունքներով գործող կենտրոնն այսօր ունի բազմաթիվ սաներ, ովքեր սովորում են Ժողովրդական, էստրադային, հոգևոր երգեր, պար, բեմական խոսք և այլն: Նրանք մասնակցում են հայոց հոգևոր մայրաքաղաքում կազմակերպված բոլոր միջոցառումներին, բացի այս համերգներով հանդես են գալիս և հայ մշակույթը ներկայացնում են տարբեր երկրներում սփյուռքի մեր հանդիսատեսի համար:
«Մեր խմբի առաջին մեծ համերգը տեղի է ունեցել Հալեպում, այնուհետև համերգ ունեցանք Ֆրանսիայում և այդպես հիմք դրվեց տարբեր երկրներ մեր շրջայցերին: Հիմա տարեկան 3 անգամ պարտադիր համերգներով հանդես ենք գալիս Իրանում, նաև եվրոպական շատ երկրներում»,-Asekose.am-ի հետ զրույցում նշեց «Վաղարշապատ» երգի պարի թատրոնի տնօրեն Անահիտ Մադոյանը:
Նախորդ տարի «Վաղարշապատ» երգի պարի թատրոնի 10-ամյակի կապակցությամբ որպես հատուկ հյուր համույթը հրավիրել էր հայտնի ֆրանսահայ երգիչ Մարթեն Յորգանցին, ում հետ միասին նրանց բացօթյա համերգը Էջմիածին քաղաքում իրական տոն էր դարձել, թե սաների և թե հենց քաղաքի բնակիչների համար:
«Այս տարի էլ մեր հիմնադրման 11-ամյակի առթիվ նախատեսում ենք Հայոց ցեղասպանության 100-ամյակին նվիրված միջոցառումների շարք տարբեր երկրներում: Առաջիկայում` մայիսի 9-ին, համերգով հանդես կգանք Ստամբուլի Սահակյան միությունում և հայ համայնքում կներկայացնենք մեր մշակույթը: Այցելելու ենք Հրանտ Դինքի գերեզման, լինելու է միջոցառում, որին ներկա կլինի նաև Ռաքել Դինքը»,-տեղեկացրեց Անահիտ Մադոյանը:
Բացի այս՝ նրա խոսքով՝ իրենք նախատեսում են, որ Սահակյան միության 100 անդամներ էլ օգոստոսին հյուրընկալեն «Վաղարշապատին».
«Էջմիածնում միջոցառումներ կկազմակերպենք և այս կերպ հիմք կդնենք, պոլսահայ և մեր Վաղարշապատի երիտասարդների բարեկամությանը»,-ընդգծեց «Վաղարշապատին» ԵՊԹ-ի տնօրենը:
Անահիտ Մադոյանը տեղեկացրեց, որ այսօր համույթում ընդգրկված են նաև սիրիահայ տաղանդավոր սաներ, ովքեր ակտիվորեն մասնակցում են խմբի աշխատանքներին:
Զրույցի ավարտին «Վաղարշապատ» երգի պարի թատրոնի տնօրենը «Վաղարշապատ» համույթի կարևոր ձեռքբերումներից առանձնացրեց ևս մեկը.
«Խումբը 2007 թվականին Գերմանիայի Համբուրգ քաղաքում մասնակցել է ՆԱՏՕ-ի գագաթաժողովին, որին մասնակցումն էին շուրջ 40 անդամ երկրների ներկայացուցիչներ: Հայաստան երգով հետաքրքիր ելույթ էինք պատրաստել, որը մեծ ընդունելության արժանացավ: Ադմիրալի կողմից ստացանք պատվոգիր, որ այսօր մեր ձեռքին կարծես գրին քարտ լինի, որովհետև եվրոպական երկրներ շրջագայության համար, միայն այդ պատվոգրի առկայությունը բավական է»:
Առաջարկում ենք դիտել նաև Մարթեն Յորգանցի մասնակցությամբ Asekose.am-ի Բացարձակ արժեք հաղորդումը:
Հեղինակ՝ Անի Միրաքյան