Երևանի «Շենգավիթ» բժշկական կենտրոնից հուլիսի 27-ին «Էրեբունի» ԲԿ տեղափոխված և երկու օր անց մահացած 26-ամյա ծննդկան Մերի Մարգարյանի գործով նշանակվել էր հանձնաժողովային փորձաքննություն:
Asekose.am-ի հետ զրույցի ընթացքում Մարգարյանների իրավհաջորդի շահերի պաշտպան Մարինե Թովմասյանը նշեց, որ առողջապահության նախարարությունը քննչական մարմնին չի փոխանցել Մերի Մարգարյանի գործով կատարված քննության արդյունքները: Նա հավելեց, որ քննիչը արդյունքները ստանալու համար գրավոր դիմում է ներկայացրել առողջապահության նախարարություն:
«Առողջապահության նախարարությունն իր իրականացրած ներքին քննության արդյունքները պետք է փոխանցեր քննիչին: Վերջինս էլ մեզ պետք է հայտներ արդյունքների մասին: Արդյունքները դեռ սեպտեմբերի վերջին արդեն պատրաստ են եղել, սակայն նախարարությունը եզրակացությունը չի փոխանցում քննչական մարմնին անհայտ պատճառներով,- ասաց իրավաբան Մարինե Թովմասյանը:
Վերջինս փաստեց, որ այդ հանգամանքը իրեն և իր պաշտպանյալներին անհանգստանալու և կասկածելու տեղիք է տալիս, քանի որ քննության արդյունքները շատ կարևոր նշանակություն ունեն գործի բացահայտման համար:
Հիշեցնենք, որ Մերի Մարգարյանի գործով նշանակվել էր դատաբժշկական փորձաքննություն, որը պարզել էր, որ 26-ամյա ծննդկանի մահը վրա էր հասել բազմաօրգանային անբավարարությունից, որն առկա է եղել Մերիի մոտ դեռևս կենդանության օրոք:
Հեղինակ՝ Լիլիթ Նավասարդյան
