Հելսինկյան քաղաքացիական ասամբլեայի հայկական կոմիտեի հրավերով դեկտեմբերի 16-18-ը եռօրյա այցով Երևանում կլինի թուրքական ժամանակակից գրականության ամենահետաքրքիր դեմքերից մեկը՝ հայտնի կին գրող Բիրգյուլ Օղուզը։ Այցելության առիթը նրա «Հա՛հ» վեպ-պատմվածաշարի հայերեն հրատարակությունն է։ Հեղինակին միջազգային ճանաչում բերած և տասնյակ լեզուներով թարգմանված այս ուշագրավ գործն արժանացել է Եվրամիության Գրական մրցանակին: Այն հասանելի է դարձել հայ ընթերցողին Եվրոպական միության կողմից ֆինանսավորվող «Աջակցություն Հայաստան-Թուրքիա կարգավորման գործընթացին» ծրագրի Եվրասիա համագործակցություն հիմնադրամի կողմից իրականացվող ենթադրամաշնորհային բաղադրամասի շրջանակներում:
«Հա՛հ»-ի հայերեն թարգմանությունն իրականացվել է յոթ թարգմանչի, գեղարվեստական թարգմանության հրավիրյալ մասնագետ-տեսաբանների (ԱՄՆ-ից, Թուրքիայից և Հայաստանից), երկու խմբագրի և հեղինակի անմիջական մասնակցությամբ, ինչն աննախադեպ է մեր իրականության մեջ և՛ ներգրավված թարգմանիչների քանակի, և՛ համագործակցային թարգմանության մեթոդի կիրառման տեսանկյունից։ Այդ նպատակով 2017-ի հունիսի 1-7-ը Հելսինկյան քաղաքացիական ասամբլեայի Հայկական կոմիտեն վերոհիշյալ ենթադրամաշնորհի շրջանակներում կազմակերպել էր գրական թարգմանիչների «Հա՛հ» սեմինարը: Թարգմանական սեմինարի մանրամասներին կարող եք ծանոթանալ՝ դիտելով CivilNet-ի պատրաստած «Գրականությունը հաղթահարում է սահմանը» տեսանյութը:
«Հա՛հ»-ը հոր մահն ու նրա իդեալների կորուստը սգացող երեք քրոջ հոգևոր ճամփորդությունն է։ Վեպ-պատմվածաշարի յուրաքանչյուր պատումն ազդու խորհրդածություն է վշտի թեմայով, հափշտակող մտապատկերների ոգեկոչում, ապշեցուցիչ դրամատիկ տրամադրությունների՝ զայրույթի, սիրո, հիասթափության, քմայքների, քնքշանքի և կարոտի հերթագայություն։ Սա մոգական գիրք է կյանքը փոփոխող այն հայտնությունների մասին, որոնք վիճակվում են ամեն մի վշտահար մարդու, թե՛ կյանքը, թե՛ մահը փառաբանող գիրք։
Գիրքը լույս է ընծայել «Անտարես» հրատարակչությունը։ «Հա՛հ»-ի հայերեն թարգմանությունից հատվածներ են հրապարակվել «Ինքնագիր» և «Գրանիշ» գրական ակումբների կայքերում։
Դեկտեմբերի 16-ին Բիրգյուլ Օղուզը կմասնակցի մի շարք միջոցառումների Արամի 42/1 հասցեում գտնվող «Ժան-Պոլ էքզիստենցիալ սրճարան»-ում: Այդ միջոցառումներն են՝
|
15:00 - 15:40 |
Ճեպազրույց (բրիֆինգ) մշակութային լրագրողների հետ: |
Հայերեն-թուրքերեն երկկողմ թարգմանությունը կապահովվի: |
|
18:00 - 20:00 |
Գրքի շնորհանդես և մակագրում: |
Միջոցառումը կվարեն գրքի խմբագիր Զավեն Բոյաջյանը և հրատարակիչ Արմեն Մարտիրոսյանը: |
|
20:00 - 22:00 |
Հանդիպում-զրույց «Ինքնագիր» գրական ակումբի անդամների և ընթերցողների հետ: |
Հանդիպումը կվարեն ակումբի նախագահ, բանաստեղծ Վիոլետ Գրիգորյանը և գրքի համախմբագիր Արմեն Հայաստանցին: |
Կարդացեք նաև` Ժան Պոլ էքզիստենցիալ սրճարանում տեղի կունենա թուրք գրողի վեպի հայերեն հրատարակության շնորհանդեսը
