Ամենայն Հայոց Կաթողիկոսը այցելել է ՀՀ ԱՆ Ռ. Յոլյանի անվան արյունաբանական կենտրոն՝ Ս. Ծննդյան տոնի առիթով իր շնորհավորանքներն ու օրհնությունը բերելու կենտրոնում բուժվող մանուկներին։
Մանկական խաղասենյակում հավաքված մանուկներին և նրանց ծնողներին Վեհափառը շնորհավորել է Նոր Տարվա և մեր Տիրոջ Սուրբ Ծննդյան հուսանորոգ տոների առիթով։ Գարեգին Բ Կաթողիկոսը, խոսելով Սուրբ Ծննդյան խորհրդի մասին, ընդգծել է, որ Աստված իր սերը և առատ շնորհները բոլորին է բաշխում ըստ իրենց կարիքների՝ պայծառակերպելով ամենքի կյանքը։ Վեհափառը հորդորել է փոքրիկներին այդ հավատով ու հույսով լցվել և մաղթել է շուտափույթ ապաքինվելով՝ վերադառնալ իրենց բնականոն կյանքին։
Կենտրոնի տնօրենն իր հերթին շնորհակալություն է հայտնել Ամենայն Հայոց Հայրապետին այցի առիթով՝ կարևորելով Եկեղեցու և կենտրոնի միջև ձևավորված գործակցությունը և պարբերաբար ցուցաբերվող աջակցությունը։ Ընդգծվել է հոգևորականների օգտակար ծառայությունը և բարերար ազդեցությունը կենտրոնում բուժում ստացող մանուկների կյանքի վրա։
Վերջում Գարեգին Բ Կաթողիկոսը զրույց է ունեցել բժիշկների հետ՝ բարձր գնահատելով նրանց նվիրյալ ծառայությունը և շնորհակալություն հայտնելով մանուկների նկատմամբ ցուցաբերվող հոգատարության համար։
Տոնի առիթով Ամենայն Հայոց Կաթողիկոսը մանուկներին ընծայել է խաչեր, Մանկական Աստվածաշնչեր և այլ նվերներ՝ Մայր Աթոռի կողմից նյութական աջակցություն ցուցաբերելով նաև նրանց ընտանիքներին։
Կարդացեք նաև՝ Ուզում եմ, որ աշխարհի բոլոր երեխաներն առողջ լինեն և այլևս չգան հիվանդանոց... Եվս մեկ նվիրված կյանք