Համացանցում տարածվել է Ստեփանակերտում ԱԱԾ հատուկ ջոկատայինների և քաղաքացիական անձանց միջեւ բախման տեսանյութը:
Այն կատարվել է ավտոլվացման կետում, որը պատկանում է միջադեպի ժամանակ ծեծված երկու քաղաքացիներից մեկին:
Հիշեցնենք, որ դեպքի հետ կապված բողոքի ակցիա էր սկսվել Արցախի մայրաքաղաքի կենտրոնական փողոցներից մեկում, որը շարունակվում է մինչև այժմ:
«Երկիր Ծիրանի» կուսակցության նախագահ Զարուհի Փոստանջյանը մեկնել է Արցախ՝ մասնակցելու բողոքի ակցիաներին և Ստեփանակերտից տեսանյութ է հրապարակել ֆեյսբուքյան իր էջում:
Հիշեցնենք նաև, որ Հայաստանի առաջին նախագահ Լևոն Տեր-Պետրոսյանն այսօր հայտարարել է, որ այն, ինչ տեղի ունեցավ Հայաստանում, մեղմ ասած, անթույլատրելի է Ղարաբաղում: «Նկատի ունեմ բողոքի զանգվածային գործողությունները և ճնշումները ԼՂՀ իշխանությունների վրա:
Պատերազմական վիճակում գտնվող պետության համար դրանք կարող են աղետալի հետևանքներ ունենալ:
Փակագծերը չեմ ուզում բացել, հետևանքները, վստահաբար, պարզ են ցանկացած բանական մարդու համար»,-նշել է Լևոն Տեր-Պետրոսյանը:
