Ազգային ժողովի ՀՀԿ խմբակցության նախկին պատգամավոր, ՀՀԿ անդամ Առաքել Մովսիսյանը (Շմայս) Ազգային անվտանգության ծառայության աշխատակիցների ուղեկցությամբ քիչ առաջ տեղափոխվել է ԱԱԾ:

Ավելի վաղ տեղեկացրել էինք, որ ԱԱԾ-ն Շմայսի առանձնատանը գործողություններ է իրականացնում: Խուզարկությունը տեւել է մոտ 2 ժամ: 

armtimes.com-ի տեղեկություններով, իրավապահները նրա տանը զենք-զինամթերք են փնտրել։

Առաքել Մովսիսյանի կինը՝ Նելլի Մովսիսյանը, կայքին փոխանցել է, որ ԱԱԾ-ականները հայտնել են, թե անօրինական զենք-զինամթերք են փնտրում:

Առաքել Մովսիսյանի եղբայրն էլ՝ Վոլոդյանը Մովսիսյանը հայտնել է, որ ԱԱԾ աշխատակիցները թույլ չեն տվել առանձնատան դարպասներից առաջանալ:  Հարցին՝ ինչ կարգավիճակով են եղբորը ԱԱԾ տարել, պատասխանել է. «Նորմալ»:

Այգեկ գյուղի համայնքապետ Վարուժան Աբրահամյանն էլ «Ազատություն» ռադիոկայանի հետ զրույցում տեղեկացրել է, որ ԱԱԾ-ն նախկին պատգամավորի տնից ոչինչ չի տեղափոխել, իսկ Ա. Մովսիսյանին տարել են ավտոմեքենայով:

 Մովսիսյանն այժմ ԱԱԾ-ում է, նա հարցաքննվում է:

Հիշեցնենք, որ հեղափոխության օրերին վարչապետ Նիկոլ Փաշինյանը խոստացել էր թրաշել Առաքել Մովսիսյանի գլուխը։